رەسەي مەن يران ءسىم باسشىلارى. فوتو: IRNA

رەسەي مەن يران ورتاسىندا پارسى شىعاناعىنا قاتىستى كەشەندى كەلىسىمدەر جاسالدى. ماسكەۋدە باس قوسقان ەكى ەلدىڭ ءسىم باسشىلارى پارسى شىعاناعىنىڭ قاۋىپسىزدىگىن قامتاماسىز ەتۋ ءۇشىن ىنتىماقتاستىق ورناتۋعا كەلىسىم بەردى. بۇل قازىرگى ۋشىعىپ تۇرعان شىعاناق ماسەلەسىندە رەسەيدىڭ دە ويىنشى رەتىندە ارالاسۋى مۇمكىن ەكەنىن كورسەتەدى.

رەسەي ءسىم باسشىسى سەرگەي لاۆروۆپەن بىرىگە وتكىزگەن ءباسپاسوز جيىنىندا يران سىرتقى ىستەر ءمينيسترى مۇحامماد جاۆاد زاريف ەكى ەلدىڭ كوپتەگەن حالىقارالىق ماسەلەلەردە ورتاق كوزقاراسقا يە ەكەنىنە كوبىرەك توقتالدى. ءارى، يران پارسى شىعاناعىنداعى رەسەيدىڭ مۇددەسىن قولداۋشى ەل ەكەنىن ايتىپ ءوتتى.

ەكى ەلدىڭ ءسىم باسشىلارى اقش-تىڭ پارسى شىعاناعىنداعى ارەكەتتەرى تۋرالى ورتاق پىكىردە ەكەنىن ءبىلدىردى. ولاردىڭ ويىنشا اقش-تىڭ پارسى شىعاناعىنا كىرۋى ايماقتىڭ تۇراقتىلىعىنا زيان كەلتىرەدى.

ءوز كەزەگىندە لاۆروۆ پارسى شىعاناعىنىڭ قاۋىپسىزدىگىن قامتاماسىز ەتۋگە رەسەيدىڭ دە مۇددەلى ەكەنىن جەتكىزە كەلىپ، شىعاناق قاۋىپسىزدىگى ايماق قانا ەمەس، باتىس ازيا مەن ەۋروپا ءۇشىن دە اسا ماڭىزدى دەگەن پىكىرىن ايتتى.

يران مەن اقش قاتىناسىنىڭ ۋشىعۋىنا بايلانىستى پارسى شىعاناعىنداعى داعدارىس كۇشەيدى. ونداعى مۇناي تاسىمالى ەۋروپا مەن ازيا ەلدەرى وزگە دە الىس قۇرلىق ەلدەرى ءۇشىن دە اسا ماڭىزدى ەكەنى بەلگىلى. شىعاناقتىڭ باتىس جيەگى اراب ەلدەرى بولسا، شىعىسى يران. الايدا، يران شىعاناقتىڭ باسىم كوپ بولەگىنە ءوز باقىلاۋىن جۇرگىزىپ كەلەدى. وڭىردەگى ەڭ ۇلكەن ستراتەگيالىق قارسىلاسى ساۋد ارابياسى اقش-تىڭ وداقتاسى سانالاتىندىقتان، تەھراننىڭ بۇل قادامى رەسەيدى ويىنعا تارتۋ دەپ باعالاۋعا بولادى.

“The Qazaq Times”