اقش پەن تالىپتەردىڭ كەلىسىمى: اۋعانستاندا بەيبىتشىلىك ورناي ما؟

اقش پەن تاليبان قوزعالىسى اۋعانستان ۇكىمەتىن قايىرىپ تاستاپ، بىرنەشە رەت كەلىسسوز جۇرگىزگەن بولاتىن. سوڭعى كەلىسسوزدە تاراپتار بىرقاتار شارتتارعا كەلىسىم بەرىستى. كەلىسىم بويىنشا اقش اۋعان جەرىندەگى 5400 اسكەرىن 20 اپتانىڭ ىشىندە شىعارىپ كەتۋى كەرەك.

كەلىسىمدى اقش-تىڭ اۋعانستانداعى ارنايى وكىلى  زالماي حاليزاد جۇرگىزۋدە. اۋعانستان پرەزيدەنتى اشراف عاني قابىلداعانى تۋرالى حابارلار تارادى. ەندى اقش پرەزيدەنتى ترامپتىڭ الدىنان ءبىر ءوتۋى كەرەك.

الايدا، اقش پەن اۋعاندىق تالىپتەر اراسىندا بەيبىتشىلىك كەلىسىمى بولىپ جاتقان تۇستا كابۋلدا جويقىن جارىلىس بولىپ، ونداعان ادام جاراقات الىپ، بەس ادام قازا تاپتى. تالىپتەر شەتەلدىك قارۋلى كۇشتەرگە شابۋىل ۇيىمداستىرعانىن راستادى. جارىلىس تا كابۋلداعى شەتەلدىكتەر تۇراتىن اۋداندا بولعان.

اۋعان ماسەلەسىن باقىلاپ وتىرعان ساراپشىلار بۇعان  دەيىن دە بەيبىتشىلىك كەلىسىمدەرىنە قاراماستان تالىپتەردىڭ تەررورلىق شابۋىلدارى تولاستامايتىنىن ايتىپ كەلگەن. كەلىسسوز كەزىندەگى كەزەكتى جارىلىس بۇعان دالەل بولعانداي.

تالىپتەر 2001 جىلدار بەرى اۋعانستانداعى ەڭ اۋماقتى ءوڭىردى ءوز باقىلاۋىندا ۇستاپ كەلەدى. ولار اۋعانستان ۇكىمەتىن اقش-تىڭ قۋىرشاعى رەتىندە قارايدى جانە ولارمەن كەلىسسوز جۇرگىزۋدەن باس تارتقان. 2001 جىلدار بەرى اقش اسكەرلەرى اۋعانستاندا سوعىسىپ كەلسە دە 18 جىل ىشىندە تاليبان تەرريتورياسى كەڭەيمەسە كەمىگەن جوق.

قول جەتكىزگەن كەلىسىمگە ساي تاليبان اۋعانستان تەرريتورياسى «ءال-كايدا» سىندى تەررورلىق توپتاردى كىرگىزبەيدى; اقش بارلىق اسكەري كۇشتەرىن ەلدەن شىعارىپ كەتەدى. «كەلىسىمگە قول قويىسىمەن ءبىز 5 اسكەري بازانى جاۋىپ، 135 كۇن ىشىندە ەلدەن شىعىپ كەتەمىز»، – دەپ مالىمدەگەن اقش وكىلى.

اۋعانستان پرەزيدەنتى كەلىسىم تۋرالى ءالى دە رەسمي مالىمدەمە جاسامادى. ول كەلىسىمدى مۇقيات قاراپ شىققاننان كەيىن عانا پىكىر بىلدىرمەك. ونىڭ ويىنشا تالىپتەر كەلىسىمدى ساقتاعان ەمەس، ساقتامايدى دا. بىراق، نەگە ەكەنى بەلگىسىز، اقش قانداي دا ءبىر قونىمدى سىلتاۋمەنەن اۋعان جەرىنەن شىعىپ كەتۋگە اسىعۋدا.

 “The Qazaq Times”