گوللانديا پوليتسەيلەرى ەرەۋىلگە شىققان تۇرىكتەردى يتكە تالاتتى

الەمدىك باق تۇركيا مەن گوللانديا اراسىندا ساياسي جانجال تۋىلعانىن حابارلاۋدا. گوللاندياداعى تۇركيا باس ەلشىلىگىنىڭ الدىندا مىڭداعان تۇركيالىق ازاماتتار ەرەۋىل جاساۋ بارىسىندا جەرگىلىكتى پوليتسەيلەر كۇش كورسەتىپ، تۇركيالىق ازاماتتاردى شارلاۋشى يتتەرگە تالاتتى دەپ حابارلايدى تۇركيا راديو-تەلەۆيزيا ورتالىعىنىڭ رەسمي سايتى.

فوتو: trt.net.tr

انادولى اقپاراتتىق اگەنتتىگىنىڭ حابارىنا قاراعاندا، كەشە تۇركيانىڭ گوللاندياداعى باس ەلشىلىگىنىڭ الدىندا تۇركيالىق ازاماتتاردان مىڭداعان ەرەۋىلشىلەر ەرەۋىلگە شىققان. ولار گوللانديا ۇكىمەتىنىڭ تۇرىك ءمينيسترىن ءوز ەلشىلىگىنە كىرگىزبەي ساياسي جانجال تۋدىرعاندارىنا، تۇركيا ازاماتتارى مەن مينيسترلەرىنە ۇستاعان پوزيتسياسىنا ءوز قارسىلىقتارىن بىلدىرگەن. گوللانديا ءتارتىپ ساقشىلارى اتتى پوليتسەيلەردى جانە شارلاۋشى يت ەرتكەن پوليتسەيلەردى ەرەۋىلدى تاراتۋعا جۇمىلدىرعان. ناتيجەدە تۇركيالىق 7 ازاماتتى يت تالاپ جارالانعان، 12 ازامات پوليتسەيلەرگە قارسىلىق جاسادى دەگەن سەبەپپەن قولعا العان.

فوتو: Mirror

تۇركيا ۇكىمەتى، تۇركيا پرەزيدەنتى مەن مينيسترلەرى گوللاندياعا كۇشتى نارازىلىقتار مەن ەسكەرتۋلەر جاساپ، اشىق تۇردە جازباشا كەشىرىم سۇراۋ حاتىن تالاپ ەتىپ وتىر. اسىرەسە، تۇرىك پرەزيدەنتى رەجەپ تايىپ ەردوعاننىڭ اسا ءزىلدى سوزدەرمەن گوللانديا ۇكىمەتىنە ەسكەرتۋ جاساۋى، ەكى ەل اراسىنداعى ساياسي جانجال سالماعىنىڭ اۋىرلىعىن كورسەتتى. تۇرىك پرەزيدەنتى سوزىندە: «سايلاۋ ناۋقانىنداعى ۋايىمى ءۇشىن، ەكى ەل اراسىنداعى ىنتىماقتى بۇزعىسى كەلسە، بۇل ءۇشىن وكىنەتىن بولادى. ءبىز ءالى نە ىستەيتىنىمىزدى بىلمەيسىزدەر، ءبىز وسىنىڭ ءبارىن جاۋاپسىز قالدىرمايمىز. مەنىڭ مينيسترىمە، دەپۋتاتىما بۇل جيىركەنىشتى ارەكەتتى جاساعاندارىڭىزعا ءالى-اق وكىنەتىن بولاسىزدار. مەنىڭ ازاماتتارىمدى ات كەۋدەسىمەن سوعىپ، يتكە تالاتقاندار ەڭ اۋىر قارسىلىققا ۇشىرايتىن بولادى»، – دەگەن ءزىلدى پىكىرىن ءبىلدىردى.

تۇركيا پرەزيدەنتى. فوتو: trt.net.tr

ال تۇركيا سىرتقى ىستەر ءمينيسترى ديپلوماتيا داعدارىسىن تۋدىرعان گوللانديادان جازباشا تۇردەگى اشىق كەشىرىم سۇراۋ حاتىن تالاپ ەتتى. تۇركيا سىرتقى ىستەر ءمينيسترى مەۆلۇت چاۆۋشوعلۋ: «تەك قانا، كەشىرىم سۇراۋ حاتى جەتكىلىكسىز. ءبىز باسقا دا قارسىلىق شاراسىنا بارامىز. ەندىگى جەردە گوللانديا وكىلەتتى جانە ەرەكشە ەلشىسى تۇركيا شەكاراسىنا كىرە المايدى»، – دەدى. ول جانە «ۆەنا» كەلىسىمىنىڭ تاپتالعانىن اتاپ ايتقان ەۋروپا ادام قۇقىقتارى سوتىنا قوسا بارلىق حالىقارالىق قۇقىق ەرەجەلەرى اياسىندا كۇرەسەتىندەرىن ءبىلدىردى. وزگە ەۋرووداق ەلدەرىنىڭ بۇل وقيعاعا قاراتقان جاۋابىن كۇتەتىنىن بىلدىرگەن چاۆۋشوعلۋ گوللانديادا 15 ناۋرىز كۇنى وتەتىن سايلاۋدا ءناسىلشىل ساياسات قايراتكەرى ۆيندەرستەن داۋىس الۋ ءۇشىن بۇل ارەكەتتىڭ تۇرىكتەرگە قارسى جاسالعانىن اتاپ كورسەتتى.

“The Qazaq Times”