پرەزيدەنت رۋحاني تەلەارنادا مالىمدەمە جاسادى. فوتو: IRNA.

"يرانعا سالىنعان سانكتسيالار الىنىپ تاستالماي تۇرىپ، يادرولىق قارۋدان باس تارتۋى تۋرالى كەلىسسوزدەر بولمايدى". بۇنداي مالىمدەمەنى يران پرەزيدەنتى حاسان رۋحاني مالىمدەدى. 

فرانتسيادا وتكەن "ۇلكەن جەتىلىك" ءسامميتىنىڭ قورتىندى ءباسپاسوز ماسليحاتىندا اقش پرەزيدەنتى دونالد ترامپ يرانمەن كەلىسسوز جۇرگىزۋگە دايىن ەكەنىن بىلدىرگەن. اقش پرەزيدەنتى سوزىندە: "جوق دەگەندە، ماسەلەنى شەشۋ ءۇشىن ءتىل تابىسامىز دەپ ۇمىتتەنەمىن. مەنىڭ ويىمشا، پرەزيدەنت رۋحاني مەنىمەن كەزدەسكىسى كەلەدى. يران تارابى ماسەلەنى شەشۋدى قالايدى دەپ قارايمىن. بۇلاردى مەن ىشكى تۇيسىگىممەن ايتىپ وتىرمىن", – دەگەن ەدى.

الايدا، يران پرەزيدەنتى رەسمي تەلە ارنا ارقىلى جاساعان مالىمدەمەسىندە اقش ءبىرىنشى قادام جاساۋى كەرەك دەگەن پىكىرىن اشىق ءبىلدىردى ول ترامپقا باعىتتاعان سوزىندە: ء"سىز يرانعا جانە ونىڭ حالقىنا باعىتتالعان بارلىق زاڭسىز جانە دۇرىس ەمەس سانكتسيالاردان باس تارتۋىڭىز كەرەك. ەگەر بارلىق توسقاۋىلدى الىپ، يران حالقىنا باسىڭىزدى يسەڭىز وندا جاعداي باسقا ارناعا بۇرىلادى", – دەدى.

اقش پرەزيدەنتى يرانعا باس ءيىپ بەرمەسى انىق. الايدا، ترامپ تا كەلىسسوزگە "كەت ارى ەمەس". قازىر فرانتسيا تارابى يران مەن اقش اراسىندا ارا اعايىندىق ەتۋگە تالپىنىپ جاتىر. ءتىپتى، پرەزيدەنت ماكرون اقش پەن يران پرەزيدەنتتەرى اراسىندا جوعارى دەڭگەيدەگى كەزدەسۋدى دە ۇيىمداستىرۋعا كۇش سالاتىنىن جەتكىزدى.

“The Qazaq Times”