كاشميردەگى ءۇندىستان ۇكىمەتى قارسى ەرەۋىل. فوتو: BBC.

كاشميردىڭ ۇندىستانعا قاراستى ايماعىندا نارازىلىق كۇشەيدى. كاشمير تۇرعىندارى وقشاۋلانىپ قالعانىنا جانە بايلانىستىڭ ناشارلاپ كەتكەنىنە نارازى. كەشە وتكەن وسىنداي نارازىلىق كەزىندە قاۋىپسىزدىك كۇشتەرى مەن ەرەۋىلشىلەر اراسىندا قاقتىعىس بولدى. 

كاشمير الەمدەگى ەڭ ۇلكەن تالاستاعى ايماق سانالادى. جاڭا دەلي ەكى اپتا بۇرىن ايماقتىڭ اۆتونوميا ستاتۋسىن الىپ تاستاعان بولاتىن. دەلي ۇكىمەتىنىڭ بۇل قادامى ۇندىستانعا قاراستى بولىپ كەلگەن كاشمير تۇرعىندارىنىڭ اشۋىنا ءتيدى. كوشەلەرگە مىڭداعان قارۋلى كۇشتەر تارتىلىپ، ينتەرنەت، ۇيالى بايلانىس ۇزىلگەن. حابارلاسۋ قۇرىلعىلارىنىڭ كوپ وتپەي قالپىنا كەلەتىنى تۋرالى ءۇندىستان ۇكىمەتىنىڭ ۋادەلەرى دە ورىندالماي جاتىر. شىدامى تاۋسىلعان كاشمير تۇرعىندارى نارازىلىق ەرەۋىلدەرىمەن كوشەگە شىقتى.

ء"بىز بۇل جاعدايعا قارسىمىز. جاعداي وسىلاي جالعاسا بەرسە، ءبىز ءار ءبىرىمىز قولىمىزعا قارۋ الامىز", – دەيدى نارازى توپتىڭ ليدەرلەرى.

قاۋىپسىزدىكتى قامتاماسىز ەتۋ ءۇشىن ءۇندىستان ۇكىمەتى 4 مىڭعا جۋىق ادامدى قاماۋعا العانىن ايتادى. ايماقتاعى ءىرى ساياساتكەرلەر دە قاماۋعا الىنۋدا. ولارعا ۇكىمەتكە قارسى بۇلىك تۋدىرماق بولدى دەگەن ايىپتار  تاعىلعان. ءۇندىستان زاڭى بويىنشا ولارعا ەكى جىلعا دەيىن سوت ءىسى جۇرگىزبەستەن قاماقتا وتىرعىزىلادى.

كەشە ايماقتاعى جاعدايى ءتىپتى دە ۋشىعىپ، ەرەۋىلشىلەر مەن قاۋىپسىزدىك كۇشتەرى قاقتىعىسىپ قالدى.

ال، ۇكىمەت وكىلى سۆاپان داسگۋپتا سوزىندە: "بۇل ەرەكشە جاعداي. ءبىز كۇش قولدانۋ قادامدارىنا بارمايمىز. بىراق، قازىر قيىن جاعدايدا تۇرعاندىقتان قاۋىپسىزدىك شارالارىن كۇشەيتىپ وتىرمىز. ءبىز ايماقتى وقشاۋلاپ، حالىقتى بايلانىسسىز قالدىرايىق دەمەدىك. تەك، قاۋىپسىزدىك ءۇشىن كەيبىر شارالاردى جاساپ جاتىرمىز", – دەگەن.

ساراپشىلاردىڭ ايتۋىنشا، كاشمير ماسەلەسى بويىنشا ۇندىستانداعى قايشىلىق جاقىن ارادا شەشىم تابۋى قيىن.

“The Qazaq Times”