سوڭعى ءۇش اي ىشىندە گونكونگ تاقىرىبى وزىنە اۋدارىپ كەلەدى. بەيجىڭ نارازىلىقتاردى «قاتەرلى دەڭگەيگە» كوتەرىلگەنىن، نارازىلاردى تەرروريستەرمەن سالىستىرعان ەدى. وسى ۋاقىتقا دەيىنگى ارالىقتا نارازىلار وزدەرىن بارىنشا بەيبىت جولدى كوزدەيتىن ازاماتتىق قوعام پوزيتسياسىندا كورسەتىپ كەلەدى. بىراق كوپتەگەن دايەك ماتەريالداردى العا تارتار بولساق، گونكونگ ۇكىمەتىنىڭ قۇقىقتىق قۇرىلىمدارى پروتەستەردى كۇشپەن تاراتۋعا تىرىساتىنىنا كوز جەتكىزۋگە بولادى. ساسي ساراپشىلاردىڭ «ەكستراديتسيالاۋ تۋرالى زاڭ جوباسىنا قارسى باستالعان بۇل ميتينگتەردىڭ ماقساتى گونكونگتىڭ بولاشاق بوستاندىعىن تالاپ ەتۋىنە ۇلاسۋى مۇمكىن» دەگەن بولجامدى تۇجىرىمدارى قازىرگى كارتينالارعا سايكەس كەلەدى. قالانىڭ كەيبىر اۋداندارىندا بىرنەشە مارتە «گونكونگتى بوساتىڭدار»، «گونكونگ ءۇشىن بوستاندىق»، «ءبىز بۇلىكشى ەمەسپىز» دەگەن ۇراندارمەن ميتينگ-شەرۋلەر وتكەن ەدى.

14 تامىز كەشكىلىك اقش پرەزيدەنتى دونالد ترامپ داعدارىس جاعدايىنداعى گونكونگ ماڭىنداعى قيىندىقتاردىڭ شەشىمىن تابۋ نۇسقالارىن تالقىلاۋ ماقساتىندا قىتاي باسشىسى شي جينپيڭمەن كەزدەسۋگە دايىن ەكەنىن مالىمدەدى.

 

ترامپتىڭ تۆيتتەر پاراقشاسىندا جازعان ۇسىنىس مالىمدەمەسى. فوتو: @realDonaldTrump

ترامپ بۇل تۋرالى ءوزىنىڭ تۆيتتەر پاراقشاسىندا حابارلادى: «ەگەر پرەزيدەنت شي گونكونگ ماسەلەسىن تەز ءارى ادامگەرشىلىك تۇرعىسىندا شەشكىسى كەلسە، ول مۇنى ىستەي الادى. بۇعان مەنىڭ ەش كۇمانىم جوق. جەكە كەزدەسۋ؟». تۆيتتەردەگى كەلەسى حابارلاماسىندا دونالد ترامپ اقش پەن قىتاي اراسىنداعى ساۋدا سوعىسىن شەشۋدىڭ الدىن الا شارتى – قىتاي بيلىگى گونكونگقا «ادام سياقتى» قاراۋىن، ىزگىلىك قارىم-قاتىناسىندا بولۋىن تالاپ ەتكەن.

كەشە 13:00  شاماسىندا قارجى ورتالىعى كوشەسىندە نارازىلار مەن پوليتسيا قىزمەتكەرلەرى تاعى دا قاقتىعىسىپ، جەدەل ءىس-قيمىل رەتىندە قۇقىق قورعاۋ ورگاندارى كوز جاساۋراتقىش گاز اتقان. دەمونسترانتتاردىڭ بەيبىت تالابىنا وسىلايشا جاۋىزدىق سيپاتتا تەز  رەاكتسيا ءبىلدىرۋى الەمدىك قۇقىقتىق ۇيىمدار مەن ادام قۇقىقتارى باستى پريوريتەتىنە اينالعان دامىعان ەلدەر تاراپىنان سىنعا ۇشىراۋدا.

اقش-تىڭ مەملەكەتتىك دەپارتامەنتى گونكونگقا جاقىن جەردەگى اسكەريلەندىرىلگەن قىتاي پوليتسياسى بولىمشەلەرىنىڭ ماڭىندا ازماتتاردىڭ ءجۇرىپ-تۇرۋىنا «ءوز الاڭداۋشىلىعىن» ءبىلدىرىپ ۇلگەردى. «امەريكا ءۇنى» اگەنتتىگىنىڭ حابارلاۋىنشا، سارسەنبى كۇنى جاريالانعان سپۋتنيكتىك سۋرەتتەردەن گونكونگپەن شەكارالاس شەنچجەن قالاسىنىڭ ستاديونىندا اسكەري تەحنيكانىڭ كوپ شوعىرلانۋى كورۋگە بولادى.

2047 جىلى قحر قۇرامىنا تولىقتاي ءوتۋى ءتيىس گونكونگ اۆتونومدى ايماعىنا زاڭ بويىنشا بيلىك ارنايى كومەك سۇرامايىنشا بەيجىڭ ەشقانداي اسكەر كىرگىزە المايدى. ون اپتادان بەرى گونكونگتىڭ ون مىڭداعان ازاماتتارى «تۇتقىنداردى قىتايعا ەكستراديتسيالاۋ تۋرالى» زاڭ جوباسىنا نارازىلىق تانىتىپ، شەرۋلەردە ۇستالعانداردى بوساتۋىن، كۇش قولدانعان پوليتسيا قىزمەتكەرلەرىنىڭ جازالانۋى مەن ەل باسشىسى كەرري لامنىڭ وتستاۆكاعا كەتۋىن تالاپ ەتۋدە.

“The Qazaq Times”