تىنىق مۇحيتىنداعى عاسىرلىق باسەكە: اۋستراليا قىتاي كەمەسىن باقىلاپ وتىر

اۋستراليا (اۆستراليا) قورعانىس مينيسترلىگىنىڭ وكىلى دۇيسەنبى كۇنى مالىمدەمە جاساپ، ءبىر قىتايلىق بارلاۋ كەمەسىنىڭ اۋستراليانىڭ جاعالاۋعا جاقىن تەڭىز ايدىنىندا جۇرگەنىن، قورعانىس كۇشتەرى قىتاي كەمەسىن قاداعالاپ وتىرعانىن جەتكىزدى.

اۋستراليا قورعانىس وكىلىنىڭ ايتۋىنشا، بۇل قىتايلىق كەمەسى اقش پەن اۋستراليانىڭ بىرلەسكەن وقۋ-جاتتىعۋىن باقىلاۋ ماقساتىندا اۋسترالياعا جاقىن سۋلارعا بارعان بولۋى مۇمكىن.

رەيتەر اگەنتتىگىنىڭ حابارىنا قاراعاندا، ەكى جىلدا ءبىر رەت وتەتىن «كەزدىك» اسكەري جاتتىعۋى جاقىندا باستالماق. كەزەكتى جاتتىعۋعا اقش پەن اۋستراليانىڭ 25 مىڭنان استام جاۋىنگەرى قاتىسادى.

ساۋدا-ساتتىق قايشىلىقتارىنا بايلانىستى اقش پەن قىتاي اراسىندا شيەلەنىس بىلتىردان بەرى ۋشىعىپ كەلە جاتقانى بەلگىلى. ونىڭ ۇستىنە قىتايدىڭ تىنىق مۇحيتتاعى، اسىرەسە وڭتۇستىك قىتاي تەڭىزىندەگى اسكەري اگرەسسيۆتى ارەكەتتەرى اقش-تىڭ قاتاڭ سىنىنا ۇشىراپ كەلەدى.

وڭتۇستىك قىتاي تەڭىزىنىڭ ەگەمەندىك قۇقىعىنا بايلانىستى تالاس كوپ. بەيجىڭ بيلىگى وسى ءبىر تابيعي رەسۋرستارعا باي ايماقتى ەجەلدەن بەرى قىتايدىڭ يەلىگىندە دەپ سانايدى. بىراق، بۇعان ماڭىندا وڭتۇستىك-شىعىس ازيالىق ەلدەر نارازى. اتالعان تەڭىزگە قىتايدان تىس، برۋنەي، مالايزيا، فيليپپين، ۆەتنام جانە تايۋاننىڭ (تايۆان) تالاسى بار.

قۇراما شتات اۋستراليا، جاپونيا جانە وڭتۇستىك كورەيا سىندى جاقىن وداقتاستارىمەن قوسا جوعارىدا اتالعان ەلدەرگە قولداۋ كورسەتۋ ارقىلى قىتايدىڭ تىنىق مۇحيتىنداعى اسكەري، ساياسي-ەكونوميكالىق ىقپالىنىڭ كەڭەيۋىنە توسقاۋىل قويۋعا تىرىسادى. بۇنى اقش پەن قىتايدىڭ تىنىق مۇحيتتاعى عاسىرلىق باسەكەسى دەۋگە دە بولادى.

“The Qazaq Times”