يران ۇكىمەتى مالىمدەمە جاساپ، 2015 جىلعى كەلىسىمگە قول قويعان ەۋروپالىق ەلدەر كەلىسىم ەرەجەلەرىن ورىنداماي، «قۇرعاق سوزدەرىن جالعاستىرا بەرسە» يران ءۇشىنشى قادامعا باراتىنىن ايتتى. بۇل تۋرالى يران سىرتقى ىستەر مينيسترلىگىنىڭ ءباسپاسوز حاتشىسى سەيەد ابباس مۋساۆي مالىمدەدى.

مۋساۆي كەشەگى مالىمدەمەسىندە، يراننىڭ كەلىسىمگە قاتىسقان ەلدەرگە بەرگەن 60 كۇن ۋاقىتى اياقتالعانىن، قول قويعان ەۋروپالىق ەلدەر كەلىسىمدى ساقتاپ قالۋعا كۇش سالماسا ءۇشىنشى قادامعا باراتىندارىن جەتكىزگەن. ءارى، يراننىڭ كەلەسى قادامى قاتاڭ بولاتىنىن ەسكەرتكەن.

ونىڭ ايتۋىنشا يران بۇعان دەيىن كەلىسىمدى ساقتاپ كەلدى جانە بارلىق ارەكەتتەرى كەلىسىم تالاپتارىنا ساي بولدى. «ءبىز ەندى يراننىڭ ۇلتتى مۇددەلەرىن قورعاۋ ءۇشىن قادامدار جاساۋعا ءتيىسپىز»، – دەگەن مۋساۆي.

گيبرالتار جاعالاۋىندا بريتان تەڭىز كۇشتەرى تارابىنان ۇستالعان يران مۇناي تانكەرى تۋرالى سۇراقتارعا جاۋاپ بەرگەن مۋساۆي: «ساياسي جانە قۇقىقتىق شارالار جاسالۋدا. قازىرگە دەيىن بريتانيانىڭ ەلشىسى ەكى رەت شاقىرىلدى جانە وزگە دە ەۋروپالىق ديپلوماتتارمەن سويلەسىپ جاتىرمىز»، – دەدى.

ول 2015 جىلعى «يران يادرولىق كەلىسىمىنە» قاتىستى سوزىندە، تەھران كەلىسىمگە قول قويعان ەلدەرگە مۇمكىندىك بەرگەنىن، الايدا ەۋروپالىق ارىپتەستەرى «قۇر سوزبەن عانا شەكتەلىپ وتىرعانىن» ايتقان.

“The Qazaq Times”