فوتو: theguardian

گونكونگتا ەكستراديتسيالاۋ تۋرالى زاڭعا تۇزەتۋلەر ەنگىزۋگە قارسى جۇزدەگەن دەمونسترانت تاعى دا شەرۋگە شىقتى. ولار جاپونيانىڭ وساكا قالاسىندا وتەتىن G20 سامميتىنە قاتىساتىن 19 ەلدىڭ كونسۋلدىق كەڭسەلەرىنە بارىپ، باسشىلارىنان قىتايعا قارسى قىسىم كورسەتۋدى تالاپ ەتتى.

نارازىلىق بىلدىرۋشىلەر اقش پەن ۇلىبريتانيانىڭ كونسۋلدىقتارىنا، سونداي-اق ەۋروپالىق وداقتىڭ وفيسىنە باردى. ولار اتالعان ەلدەردىڭ باسشىلارىنا ارنايى حات جازىپ اپارعان. ماسەلەن، ترامپقا ارنالعان حاتتا: "بىزگە وسى اۆتوريتارلىق رەجيمگە قارسى كۇرەسۋ ءۇشىن سىزدەردىڭ كومەكتەرىڭىز اسا قاجەت " دەلىنگەن.

سونىمەن قاتار، نارازىلىق بىلدىرۋشىلەر 19 مەملەكەتتىڭ، سونىڭ ىشىندە اۋستراليا، كانادا جانە جاپونيانىڭ كونسۋلدىقتارىنا ءوتىنىش بەردى. كەلەسى شەرۋ سارسەنبى كۇنى كەشكە جوسپارلانعان.

مارشتى ۇيىمداستىرۋشى ۆەنتۋس ءلاۋدىڭ ايتۋىنشا،  شەرۋگە 1500 ادام قاتىسقان. شەرۋدىڭ الدىڭعى جاعى كونسۋلدىقتارعا جەتتى، ال قالعانى  ساياباقتا قالدى دەيدى ول.

سونداي-اق،  گونكونگتىڭ ىسكەرلىك ورتالىعىنداعى Chater Garden-گە دە ءبىراز ادام جينالعان. ولار "گونكونگتى بوساتىڭىز!" دەپ جازىلعان اق جەيدە كيىپ، پلاكاتتار ۇستاپ، "گونكونگتى بوسات!" دەپ ۇراندادى. سونداي-اق، ءبىر پلاكاتتا "گونكونگتى قىتايدىڭ كولونيزاتسياسىنان ازات ەت!" دەپ جازىلعان. ال ەندى بىرىندە "پرەزيدەنت ترامپ، گونكونگقا بوستاندىق الىپ بەرىڭىزشى" دەسە، كەلەسى پاراقشادا ء"بىزدىڭ ارمانىمىز بيىك، قورقىنىشسىز ءومىر سۇرگىمىز كەلەدى. قىتايدىڭ ەكستراديتسيالاۋ ساياساتىنا "NO" دەپ ايتىڭىز!" دەلىنگەن.

شەرۋگە شىققاندار 16 ماۋسىمداعى ميتينگتە پوليتسيانىڭ ءجۇز مىڭداعان ادامدى تاراتۋ ءۇشىن كوز جاساۋراتاتىن گاز بەن رەزەڭكە وقتاردى پايدالانعانىن ايىپتاپ وتىر. "بىزدە باسقا تاڭداۋ جوق. بيلىك ءبىزدىڭ تالاپتارىمىزعا قۇلاق اسپادى، سول سەبەپتى كومەكتى حالىقارالىق قوعامنان ىزدەيمىز",  - دەيدى لاۋ.

ايتا كەتەيىك، 16 ماۋسىمدا گونكونگتە 2 ميلليونعا جۋىق ادام نارازىلىق شەرۋىنە شىققان ەدى. بۇل گونكونگ تاريحىندا بولماعان ماسسالىق نارازىلىق اكتسياسى. كەيىن ەل بيلىگى ارنايى مالىمدەمە جاساپ، حالقىنان كەشىرىم سۇرادى، جۇرت نارازى بولعان ەكستراديتسيالاۋ تۋرالى زاڭ جوباسىن قابىلداۋدى ۋاقىتشا توقتاتىپ قويدى.

"The Qazaq Times"