يزرايل بارلاۋ كومپانياسى تۇسىرگەن سۋرەتتەر. فوتو: ImageSat International.

قىتاي اسكەري اۋە كۇشتەرى وڭتۇستىك قىتاي تەڭىزىندەگى پاراسەل ارالدارىنا (قىتايدا شيشا ارالدارى دەپ اتالادى) J-10 جاۋىنگەرلىك ۇشاعىن ورنالاستىردى. بۇل قىتايدىڭ وڭتۇستىك قىتاي تەڭىزىندە 12 جىلدان بەرى العاش رەت اتالعان ءىرى اسكەري تەحنيكالارىن پايدالانۋى.  

كوپتەگەن ەلدىڭ اقپارات قۇرالدارى قىتايدىڭ بۇل ارەكەتىن جاپونيادا وتكەلى جاتقان «ۇلكەن جيىرمالىق» ءسامميتىنىڭ الدىندا وڭتۇستىك قىتاي تەڭىزىنىڭ تەرريتوريا قۇقىعىنا بايلانىستى ءوز ۇستانىمىن كورسەتۋى دەپ باعالاعان.

كەشە، 20 ماۋسىم كۇنى امەريكالىق CNN ارناسى مەن بريتانيانىڭ «Daily Mail» باسىلىمى قىتايدىڭ  تورت بىردەي J-10 جاۋىنگەرلىك ۇشاقتارىنىڭ پاراسەل ارالدارىنا ورنالاستىرعانىن كورسەتەتىن سۋرەتتەردى جاريا ەتتى. بۇل سۋرەتتەردى ءيزرايلدىڭ ImageSat International اتتى ەكى بارلاۋ كومپانياسى تۇسىرگەن.

اقش پەن اۋستراليانىڭ اسكەري ماماندارى قىتايدىڭ بۇل ارەكەتىن وزدەرىنىڭ وڭتۇستىك قىتاي تەڭىزىندەگى ىقپالى مەن قابىلەتىن كورسەتۋ ءۇشىن جاساعان دەپ قارايدى. مامانداردىڭ پىكىرىنشە، قىتاي بۇل ارەكەتتەرى ارقىلى قاجەت بولعان جاعدايدا وڭتۇستىك قىتاي تەڭىزىندە اۋە كۇشتەرىن قولدانا الاتىنىن، اۋە تەحنيكالارى ەركىن ۇشىپ قونا الاتىن بازالارىنىڭ بار ەكەنىن كورسەتۋ. سول ارقىلى ايماقتاعى ەلگە ءوزىنىڭ كۇش-قۋاتىن كورسەتۋدى ماقسات ەتكەن.

ال، ءفيليپپيننىڭ كەيبىر باسىلىمدارى جاساندى جەر سەرىكتەن تۇسىرىلگەن سۋرەتتەردە قىتايدىڭ J-10 ۇشاقتارىنان تەك تورتەۋى عانا كورىنگەنىمەن، پاراسەل ارالارىندا ودان دا كوبىرەك قىتايلىق اۋە كۇشتەرى بولۋى مۇمكىن دەپ جازعان.

قالاي بولعان كۇندە دە، G20 ءسامميتىنىڭ قارساڭىندا قىتايدىڭ حالىقارالىق داۋلى تەرريتورياداعى ارەكەتتەرى الەم ەلدەرىنىڭ، اسىرەسە تىنىق مۇحيت جاعالاۋ ەلدەرىنىڭ نازارىن وزىنە اۋداردى. قىتاي وڭتۇستىك قىتاي تەڭىزىنىڭ باسىم كوپ اۋماعىن ءوز تەرريتورياسى رەتىندە قارايدى. بۇل رەتتە ول اتالعان تەڭىزگە شەكتەسەتىن ۆەتنام، مالايزيا، فيليپپين سەكىلدى بىرقاتار ەلدەرمەن تەرريتوريالىق تالاسقا تۇسكەن.

“The Qazaq Times”