تۇركيالىق اقپارات قۇرالدارىنىڭ حابارىنا قاراعاندا، رەسەيدەن ساتىپ العان S-400 زىمىرانعا قارسى قورعانىس تەحنيكالارىنىڭ العاشقىلارى ماۋسىم ايىنىڭ سوڭىنا قاراي تۇركياعا جەتكىزىلەدى. 

حابارعا قاراعاندا، تۇركيا تەرريتورياسىنا العاشقى S-400 تەحنيكاسىن ورناتۋ جۇمىستارىن رەسەيلىك ماماندار توبى جۇزەگە اسىرماق. العاشقى ادىمدا قورعانىس تەحنيكاسىنىڭ ەكى باتەرەياسى تۇركيا جەرىنە ورنالاستىرىلادى. سىناق اياقتالعانعا دەيىن رەسەيلىك ماماندار تۇركيادا تەحنيكالىق كومەك كورسەتپەك.

مالىمەتتەرگە سايكەس، اۋە قورعانىس جۇيەسىنىڭ قالعان بولشەكتەرى جىل سوڭىنا دەيىن تۇركياعا جەتكىزىلىپ بولادى.

تۇركيانىڭ رەسەيلىك اۋە قورعانىس جۇيەسىن ساتىپ الۋى قۇراما شتات پەن تۇركيا اراسىندا سالقىندىق تۋعىزعان ەدى. اقش رەسەيلىك قورعانىس جۇيەسى ناتو اۋە تەحنيكالارىنا كەدەرگى كەلتىرەدى دەپ قارايدى. الايدا، تۇركيا اقش جانە ناتو وداقتاستارىنىڭ نارازىلىعىنا قاراماستان رەسەي اۋە تەحنيكاسىن ساتىپ الۋعا شەشىم قابىلداعان.

پرەزيدەنت ەردوعان مالىمدەمەسىنىڭ بىرىندە، رەسەيلىك تەحنيكا ارقىلى اۋە قورعانىسىن قامتاماسىز ەتە وتىرىپ، وتاندىق قورعانىس جۇيەسىن وندىرۋگە كۇش سالاتىنىن ايتقان.

“The Qazaq Times”