قازاقستاننان وزگە مەملەكەتتەرگە 172,8 ميلليارد تەڭگە اۋدارىلعان.

Ranking.kz سايتىنىڭ مالىمەتىنە قاراعاندا، كورسەتىلگەن سوما قاڭتار مەن ءساۋىر ارالىعىندا اۋدارىلعان. اۋدارىمداردىڭ ەڭ كوپ سوماسى رەسەيگە تيەسىلى. سونىمەن قاتار، قارجىنىڭ ۇشتەن ەكى بولىگى رەسەي، وزبەكستان جانە تۇركياعا اۋدارىلعان. قارجىنىڭ باسىم بولىگى «زولوتايا كورونا» حالىقارالىق اقشا اۋدارىمدار جۇيەسى ارقىلى جۇزەگە اسىرىلعان.

بيىلعى كورسەتكىش 2018 جىلمەن سالىستىرعاندا 8,6%-عا ارتىق. سولتۇستىكتەگى كورشى ەلگە 65 ميلليارد تەڭگە جونەلتىلگەن. ەكىنشى ورىندا – وزبەكستان. بۇل مەملەكەتكە قازاقستاننان 26 ميلليارد 500 ميلليون تەڭگە اۋدارىلعان. وتكەن جىلمەن سالىستىرعاندا 36,2%-عا جوعارى. ءۇشىنشى بولىپ تىزىمدە تۇرعان تۇركياعا 25,8 ميلليرد تەڭگە اۋدارىلعان.

ال التىن قورىنا توقتالىپ وتەر بولساق، 2019 جىلدىڭ العاشقى توقسانىندا قازاقستاننىڭ جالپى حالىقارالىق قورى 13,6%-عا ازايعان. ۇلتتىق بانك وكىلدەرىنىڭ ايتۋىنشا، قوردىڭ كەمۋىنە كوررەسپوندەنتتىك ەسەپشوتتاعى شەت ەل ۆاليۋتاسىنىڭ ازايۋى اسەر ەتتى. وعان قوسا ۇكىمەتتىڭ سىرتقى قارىزدارىن وتەۋ سىندى مىندەتتەردى ورىنداۋ سەبەپ بولعان. دەگەنمەن، العاشقى ءتورت ايدا حالىقارالىق قورداعى التىننىڭ ۇلەسى بۇرىنعىمەن سالىستىرعاندا ءبىرشاما ارتقان.

ايتا كەتەيىك، جاقىندا ۇلتتىق بانك بەلگىلەگەن رەسمي باعام بويىنشا، ءبىر اقش دوللارى 384 تەڭگە 02 تيىنعا تەڭ. شەتەلدىك ۆاليۋتانى ايىرباستاۋ بولىمشەلەرىندە 384-385 تەڭگەگە ساتىپ الۋعا بولادى.

"The Qazaq Times"