رەسەيدىڭ تۇركياعا ساتىپ بەرەتىن زىمىران قورعانىس جۇيەسى كەلىسىم ۋاقىتىنان كەشىكتىرىلمەيدى. بۇنداي مالىمدەمەنى كەشە كرەملدىڭ ءباسپاسوز وكىلى دميتري پەسكوۆ ەلىمىزدىڭ استاناسىندا مالىمدەگەن.

كرەمل وكىلىنەن جۋرناليستەر رەسەي مەن تۇركيا اراسىنداعى S-400 اۋە قورعانىس جۇيەسىن ساتۋ جانە ساتىپ الۋ ءىسى تۋرالى سۇراعاندا، پەسكوۆ اتالعان قورعانىس تەحنيكاسىنىڭ تۇركياعا ۋاقىتىندا جەتكىزىلەتىنىن ايتقان. «كەلىسىمدەگى ۋاقىتتان كەشىكتىرىلمەيدى، ءتىپتى مەرزىمىنەن بۇرىن جەتكىزىلۋى دە مۇمكىن»، – دەگەن ول سوزىندە.

تۇركيانىڭ رەسەيلىك قورعانىس جۇيەسىن ساتىپ الۋى ونىڭ ناتو-داعى كەيبىر وداقتاستارىنا «ۇنامايدى». ايتالىق، اقش تارابى تۇركيانىڭ بۇل قادامى وداقتىڭ اۋە قورعانىس جۇيەسىنە كەرى اسەرىن تيگىزەدى دەپ قارايدى. الايدا، اۋە قورعانىسىن قامتاماسىز ەتپەگەن وداقتاستارىنا «وكپەلى» تۇركيا رەسەيلىك قارۋدى ساتىپ الۋ شەشىمىن وزگەرتكەن جوق.

اتالعان قورعانىس قارۋىنىڭ تۇركيادا ورناتىلۋى اقش-تىڭ وڭىردەگى اۋە قورعانىس تەحنيكالارىنا اسەر ەتۋى مۇمكىن دەگەن بولجامدار بار. اسىرەسە، قۇراما شتاتتار باس بولىپ وندىرەتىن F-35 ۇشاقتارى ءۇشىن جاڭا سىناق بولماق. سونىمەن بىرگە، بۇل تۇركيا مەن اقش قاتىناسىنىڭ سالقىنداۋىنا دا سەبەپ بولۋى بەك مۇمكىن.

“The Qazaq Times”