جاپونيادا مەملەكەتتىك ساپاردا جۇرگەن اقش پرەزيدەنتى كەشە سولتۇستىك كورەيا ماسەلەسىنە بايلانىستى "قۋانارلىق ىستەردىڭ بولاتىنىن" ايتتى. ونىڭ ايتۋىنشا، سولتۇستىك كورەيا باسشىسى كيم جوڭ ۋن (كيم چەن ىن) كورەگەن ادام جانە ول ەلىنىڭ دامۋى ءۇشىن يادرولىق قارۋدان باس تارتادى. ء"وز باسىم سولتۇستىك كورەيا ماسەلەسىنە بايلانىستى كوپتەگەن جاقسى وزگەرىستەر بولادى ويلايمىن", – دەگەن پرەزيدەنت ترامپ. 

اقش پرەزيدەنتى دونالد ترامپ سولتۇستىك كورەيا تۋرالى جاڭا مالىمدەمەسىنەن بۇرىن، جاپونيانىڭ باس ءۋازىرى (پرەمەر-ءمينيسترى) شينزر ابەمەن كەڭەيتىلگەن قۇرامادا كەزدەسۋ وتكىزگەن بولاتىن. كەزدەسۋدەن كەيىن ەكى ەل باسشىسى بىرلەسكەن ءباسپاسوز جيىنىن وتكىزدى. ترامپتىڭ پىكىرىنشە سولتۇستىك كورەيا يادرولىق باعدارلامانى دامىتۋعا قادام جاسامايدى، سەبەبى، كيم جوڭ ۋن يادرولىق قارۋ-جاراققا سۇيەنۋ ارقىلى دامۋدىڭ قيىنشىلىقتارى مەن كەمشىلىكتەرى تۋرالى جاقسى بىلەدى.

اقش پرەزيدەنتى بۇعان دەيىن دە سولتۇستىك كورەيانىڭ سوڭعى زىمىران سىناقتارى ولاردىڭ كەلىسسوزدەن مۇلدە بەت بۇرعانىن كورسەتپەيدى دەگەن پىكىردە بولعان. جانە وسى ماسەلە بويىنشا اقش پرەزيدەنتى مەن ونىڭ ۇلتتىق قاۋىپسىزدىك جونىندەگى كەڭەسشىسى اراسىندا پىكىر قايشىلىعى تۋىلعان ەدى. بولتون ترامپتان ءبىر كۇن بۇرىن جاساعان مالىمدەمەسىندە، سولتۇستىك كورەيانىڭ زىمىران سىناقتارى بۇۇ قارارىنا قايشى دەگەن مالىمدەمە جاساعان ەدى.

جاپونيا سولتۇستىك كورەيانىڭ زىمىران قاۋپىنەن الاڭدايدى. سولتۇستىك كورەيانىڭ بىرنەشە رەتكى تابىستى سىناقتارى جاپون تەڭىزىندە جاسالدى جانە بالليستيكالىق زىمىراندارى جاپونيا كەڭىستىكتەرىنەن ۇشىپ وتكەن بولاتىن. توكيو بيلىگى اقش پەن سولتۇستىك كورەيا اراسىندا كەلىسسوزدەردىڭ جالعاسۋىن جانە كورەي تۇبەگىنىڭ تەز ارادا يادرولىق قارۋسىزدانۋىن ءۇمىت ەتەدى.

“The Qazaq Times”