رەسەي پرەزيدەنتى ۆلاديمير پۋتين يراننىڭ يادرولىق كەلىسىمى تۋرالى پىكىرىن ءبىلدىرىپ، 2015 جىلعى كەلىسىمنەن كەيىن تەھراننىڭ اشىق يادرولىق باعدارلاما جۇرگىزىپ كەلگەنىن ايتتى. بۇل تۋرالى يراننىڭ IRNA اقپاراتتىق اگەنتتىگى حابارلادى.

پۋتين سوزىندە يراننىڭ يادرولىق باعدارلاما جونىندەگى لاۋازىمدىلارىمەن كەزدەسۋى كەزىندەگى مالىمەتتەرگە سىلتەمە جاساي وتىرىپ، يراننىڭ كەلىسىمگە ساي ارەكەت جاساپ كەلگەنىن راستاعان. دەگەنمەن، 2015 جىلعى كەلىسىمنىڭ ساقتالىپ قالۋى ءبىر عانا رەسەيگە عانا بايلانىستى ەمەس ەكەنىن ايتادى.

ال، يراننىڭ 2015 جىلعى كەلىسىمنەن شىعۋى تۋرالى دا ءوز پىكىرىن بىلدىرگەن. ول يراننىڭ اتالعان كەلىسىمنەن شىعۋى يران ءۇشىن ءتيىمسىز بولاتىنىن، سەبەبى، تەھران تارابى كەلىسىمنەن شىققان ساتتەن باستاپ، داعدارىستىڭ بارلىق كىناسى يرانعا جۇكتەلىپ، كەلىسىمنەن ەڭ الدىمەن باس تارتقان قۇراما شتاتتىڭ ارەكەتى ۇمىتىلىپ كەتەتىنىن ايتادى.

قازىر يران ماسەلەسى  حالىقارالىق ەڭ وزەكتى تاقىرىپقا اينادى. سەبەبى، ەكونوميكالىق داعدارىستاردان تىعىرىققا تىرەلگەن يران قارۋلى ارەكەتتەرگە بارۋى دا مۇمكىن دەگەن بولجامدار بار. بۇل اقش پەن يران اراسىندا قارۋلى قاقتىعىستاردىڭ قاۋپىن بارعان سايىن ارتتىرۋدا.

 “The Qazaq Times”