ۋكراين جۇرتى انا تىلدەرىن بىردەن-ءبىر مەملەكەتتىك ءتىل ەتىپ بەكىتتى

ۋكراينا جوعارى راداسى ۋكراين ءتىلىن بىردەن-ءبىر مەملەكەتتىك ءتىل ەتىپ بەلگىلەگەن زاڭ جوباسىن بەكىتتى. بۇل زاڭ مەملەكەتتىك ءتىلدى ءسوزسىز ءبىلۋدى مىندەتتەيدى جانە باسقا تىلدەردىڭ قولدانىلۋىن شەكتەيدى. اتالعان زاڭنىڭ تارماقتارىندا ورىس ءتىلى تۋرالى بىردە-ءبىر رەت ايتىلماعانىمەن، ەسەسىنە اعىلشىن ءتىلى تۋرالى 18 جەردە ايتىلعان.

جوعارى رادا قابىلداعان زاڭ بويىنشا، ۋكراين ءتىلى مەملەكەتتىك جانە رەسمي ءتىل بولىپ بەكىتىلگەن. ال، رادا توراعاسى اندرەي پارۋبي بۇل تۋرالى پىكىرىندە: «ۋكراين ءتىلى – ەلدىڭ ۇلتتىق قاۋىپسىزدىگى. 2014 جىلى رەسەي تانكتەرى قاي جەردە ورىس ءتىلى بولسا سول جەرگە باردى. ۋكراين ءتىلى مەملەكەتتىك نەگىزىن قۇرايدى. بۇل تۋرالى زاڭنىڭ بولۋى ۋكرايندىقتاردىڭ ءوزىن ءوزى قۇرمەتتەگەنىن كورسەتەدى»، – دەپ باعالاعان.

ۋكراين جوعارى راداسى قابىلداعان زاڭ بويىنشا انا تىلدەرى ورتالىق جانە جەرگىلىكتى بيلىكتىڭ، سونداي-اق بارلىق قوعامدىق تارماقتارىندا  ارتىقشىلىققا يە بولا الادى. ۋكراينا ازاماتتىعىن الۋ ءۇشىن مىندەتتى تۇردە مەملەكەتتىك ءتىلدى بىلەتىنىن دالەلدەۋى كەرەك. ال، ۋكراينادا جاسايتىن وزگە از ساندى ۇلتتاردىڭ مەكتەپكە دەيىنگى جانە مەكتەپتە ءوز انا تىلىندە ءبىلىم الۋعا قۇقىعى بار دەپ كورسەتىلگەن.

سونداي-اق، مەملەكەتتىك ءتىل تۋرالى اتالعان زاڭ قابىلدانعاننان كەيىن 2 جىل تولعاندا مەملەكەتتىك تەلەارنالار مەن راديولار مەملەكەتتىك تىلدەگى ەفير ۋاقىتى 90 پايىزعا دەيىن كوتەرۋگە مىندەتتى. جەرگىلىكتى كانالدار بولسا 80 پايىز مەملەكەتتىك تىلدە ەفير جۇرگىزۋگە مىندەتتەلگەن. باسقا تىلدەردە جارىق كورەتىن باسىلىمدار ۋكراين تىلىندەگى نۇسقاسىن شىعارۋعا مىندەتتەلدى.

قابىلدانعان زاڭ ۋكراين تەرريتورياسىنداعى كومپيۋتەرلىك پروگراممالاردىڭ ينتەرفەيسى ۋكراين جانە اعىلشىن تىلىندە بولۋدى تالاپ ەتەدى. ورىس ءتىلىن قولدانۋدى شەكتەيدى.

مەملەكەتتىك قىزمەتكەرلەر مەملەكەتتىك ءتىلدى بىلۋگە مىندەتتى. زاڭ قابىلدانىپ ءبىر جارىم جىلدان كەيىن بارلىق قىزمەت وتەۋ ورىندارىندا مەملەكەتتىك ءتىل قولدانىلۋى كەرەك. ايتالىق، رەستورانداردان تارتىپ، ينتەرنەت-دۇكەندەرگە دەيىن مەملەكەتتىك تىلدە قىزمەت وتەۋدى تالاپ ەتەدى. ارينە، كەيدە تۇتىنۋشىنىڭ تالابىنا قاراي وزگە تىلدە قىزمەت الۋىنا زاڭ شەكتەۋ قويمايدى.

پرەزيدەنت پوروشەنكو سايلاۋ كەزىندە «سەنىم، ءتىل جانە ارميا» دەگەن ۇرانمەن وتكىزگەن بولاتىن. ول بۇل زاڭ جوباسىن اشىق قولدايتىنىن كورسەتكەن، سايلاۋدان ۇتىلىپ قالعاننان كەيىن، رادا ماقۇلداعاننان كەيىن بىردەن قول قويىپ كەتەتىنىن بىلدىرگەن. جاڭا سايلانعان پرەزيدەنت زەلەنسكي دە بۇل تۋرالى پىكىرن ءبىلدىرىپ، زاڭدى اتقارۋدى جولعا قوياتىنىن، بىراق، جازالاۋ، تىيىم سالۋ ارقىلى ەمەس، ءپوزيتيۆتى جانە مۇمكىندىكتەر بەرە وتىرىپ جۇزەگە اسىراتىنىن ءبىلدىردى.

“The Qazaq Times”