قازاقستان قىتايدان 113 ميلليارد تەڭگە نەسيە الاتىن بولدى.

بۇگىن پارلامەنت سەناتىنىڭ جالپى وتىرىسىندا دەپۋتتاتتار قىتايدان قارىز الۋعا بايلانىستى ەكى ەل اراسىنداعى كەلىسىمدى راتيفيكاتسيالاۋ جونىندەگى زاڭدى ماقۇلدادى.

قازاقستان قىتايدان 113 ميلليارد تەڭگە (2 ميلليارد يۋان) نەسيەنى 20 جىلعا 2 پايىز وسىممەن الماق. اتالمىش قارجى شەكاراداعى توعىز كولىك بەكەتى مەن ءبىر تەمىر جول بەكەتىن جاڭارتۋ مەن تەحنيكالىق جاراقتاندىرۋعا جۇمسالادى دەپ جوسپارلانۋدا.

2019 جىلدىڭ قاڭتار ايىنداعى ستاتيستيكا بويىنشا، قازاقستاننىڭ سىرتقى قارىزى 158 ملرد 800 ملن اقش دوللارىن قۇراعان. ونىڭ 63,5 پايىزى فيرما-ارالىق بەرەشەك، 25 پايىزى كرەديتورلار الدىنداعى سىرتقى قارىز، 7,8 پايىزى مەملەكەتتىڭ سىرتقى بەرەشەگى. قالعان 3,6 پايىزى ۇكىمەت پەن بانك سەكتورىنىڭ سىرتقى مىندەتتەمەلەرىنە تيەسىلى قارىزدار.

"The Qazaq Times"