جارىلعىش تيەلگەن كولىكتىڭ قالدىقتارى. فوتو: VOA.

ءبىر كۇن بۇرىن اۋعانستاننىڭ كابۋل قالاسىندا بولعان تەررورلىق شابۋىلدان 3 امەريكالىق جاۋىنگەر جانە ءبىر قارجىگەر قازا تاپقان.

اۋعانستان رەسميلەرى تارابىنان جاسالعان مالىمدەمەدە، شابۋىلدان تاعى ءۇش اقش اسكەرىنىڭ جاراقات العانى ايتىلادى شابۋىلدى ەلدەگى تاليبان قارۋلى ۇيىمى ءوز موينىنا العان.

اۋعانستانداعى اقش قارۋلى كۇشتەرىنىڭ جازباشا مالىمدەمەسىنە قاراعاندا، تەررورلىق شابۋىل جارىلعىش تيەلگەن كولىك ارقىلى جاسالعان. قارۋلى توپ مۇشەلەرى جارىلعىش تيەلگەن كولىكتى كابۋلداعى باگرام اۋە بازاسىنا جاقىن ماڭدا جارىپ جىبەرگەن. اتالعان اۋە بازاسى اقش-تىڭ اۋعانستانداعى ەڭ ءىرى اسكەري بازاسى سانالادى.

اقش-تىڭ اۋعانستانداعى ارنايى وكىلى تالىپتەرمەن كەلىسسوز جۇرگىزۋگە بارىنشا كۇش سالۋدا. اۋعانستان ۇكىمەتى دە بەيبىتشىلىك كوشباسشىلىق كەڭەسى اتتى جاڭا كواليتسيالىق كەڭەس قۇرىپ، تالىپتەرمەن كەلىسسوزگە دايىندالۋدا. سوعان قاراماستان، ەلدەگى تالىپتەردىڭ قارۋلى شابۋىلدارى توقتاماي كەلەدى.

“The Qazaq Times”