اۋعانستاننىڭ ۆيتسە-پرەزيدەنتى تالىپتەردىڭ قاستاندىعىنا ۇشىرادى

اۋعانستاندا تاليبان توبى ەلدىڭ ۆيتسە-پرەزيدەنتى ابدۋل راشيد دوستۋمعا قارۋلى شابۋىل جاساعان. اۋىر جارالى بولعان ۆيزە-پرەزيدەنت جان ساقتاۋ بولىمىنە تۇسكەن.

گەنەرال ابدۋل راشيد دوستۋم بالح پروۆينتسياسىنا بارعان ساپارى كەزىندە تالىپتەردىڭ قارۋلى شابۋىلىنا ۇشىراعان. دوستۋمنىڭ قورعاۋشى قىزمەتكەرلەرى تالىپتەرگە قارسى ءبىر ساعاتقا جۋىق سوعىسقان. اتىس كەزىندە ەكى قاۋىپسىزدىك قىزمەتكەرىنىڭ جارالى بولعانى تۋرالى مالىمەت بار. تاليبان تارابى رەسمي مالىمدەمە جاساپ، شابۋىل ۇيىمداستىرعاندارىن مويىنداعان.

بىلتىر شىلدە ايىندا دوستۋم اۋعانستانعا قايتىپ ورالعان كەزىندە اۋەجايدا شابۋىلعا تاپ بولىپ، 14 ادام وققا ۇشقان بولاتىن. سول رەتكى شابۋىلدى «يسلام مەملەكەتى» تەررورلىق توبى ءوز موينىنا العان بولاتىن. بۇل رەت دوستۋم ءبىر جىل ىشىندە ەكىنشى رەت قاستاندىق شابۋىلىنان امان قالعان.

تەگى وزبەك بولعان ۆيتسە-پرەزيدەنتى بىلتىرعا دەيىن شەتەلدەردە باس ساۋعالاپ جۇرگەن. 2001 جىلى تالىپتەردى بيلىكتەن شەتتەتۋدە اقش-قا كومەكتەسكەنى تۋرالى بەلگىلى. ول اۋعانستانداعى ازاماتتىق سوعىستا تالاستى ساياسي تۇلعانى ءبىرى سانالادى. 2014 جىلى اۋعانستان ۇكىمەتى جاعىنا شىققان. ءبىر جىل بۇرىن وعان تاعىلعان ساياسي ايىپتارعا بايلانىستى تۇركياعا ساياسي باسپانا سۇراي بارعان. بىراق، ول وزىنە تاعىلعان ايىپتاردى جوققا شىعارىپ، تۇركياعا ەمدەلۋ ءۇشىن بارعانىن ايتقان.

ەلدىڭ سولتۇستىك وڭىرلەرىندەگى ساياسي ويىنشىلار گەنەرال دوستۋمنىڭ ەلگە ورالۋىن تالاپ ەتكەننەن كەيىن اشراف عاني بيلىگى ونىڭ ەلگە كەلۋىنە جول قويسا كەرەك. اۋعانستاننىڭ سولتۇستىگىندە جاسايتىن وزبەكتەر ەلدەگى ەتنيكالىق توپتاردىڭ اراسىندا سان جاعىنان ءتورتىنشى ورىندى يەلەيدى. كەيبىر ساراپشىلار، پرەزيدەنت اشراف عاني الداعى سايلاۋدا وزبەك ازشىلىعىنىڭ داۋىسىنا يە بولۋ ءۇشىن دوستۋمنىڭ ەلگە كەلۋىنە جول بەرگەن دەسەدى.

“The Qazaq Times”