رەسەي ءسىم-ءى ترامپتىڭ ەسكەرتۋىنە قارسى پىكىر ءبىلدىردى. فوتو: Daily Express.

اقش پرەزيدەنتى دونالد ترامپ رەسەيگە ۆەنەسۋەلادان شىعىپ كەتۋدى ەسكەرتكەن ەدى. رەسەي تارابى بۇعان قاراما-قارسى مالىمدەمە جاساپ، اقش-تىڭ ءسۇريادان شىعىپ كەتۋىن تالاپ ەتتى.

رەسەي سىرتقى ىستەر مينيسترلىگىنىڭ مالىمدەمەشىسى ماريا زاحاروۆا رەسمي تەلەارناسىندا اقش-قا قاراتقان سوزىندە: «وزگەلەرگە ەسكەرتۋ جاساۋدان بۇرىن وزدەرى ءسۇريادان شىعىپ كەتۋى كەرەك»، – دەدى.

وسىدان بۇرىن ترامپ ۆەنەسۋەلا وپپوزيتسياسىنىڭ جەتەكشىسى حۋان گۋايدونىڭ جۇبايىن اق ۇيدە قابىلداعان كەزدە ماسكەۋدىڭ ۆەنەسۋەلاعا ىسىنە ارالاسۋى تۋرالى پىكىرىن بىلدىرگەن ەدى. ترامپ سوزىندە رەسەيگە ۆەنەسۋەلادان شەگىنۋدى ەسكەرتكەن.

رەسەي ءسىم وكىلىنىڭ ايتۋىنشا اقش حالىقارالىق قاۋىمداستىق الدىنداعى ۋادەسىن ورىنداماي وتىر. ترامپتىڭ رەسەيگە جاساعان ەسكەرتۋىن سىنعا العان  زاحاروۆا اقش پرەزيدەنتىنىڭ يزرايل مەن ءسۇريا اراسىنداعى داۋلى تەرريتورياعا بايلانىستى شەشىمىن دە ايىپتاعان.

حابارعا قاراعاندا 24 ناۋرىز كۇنى ءبىر رەسەيلىك اسكەري تاسىمال ۇشاعى مەن سوعىس ۇشاعى ۆەنەسۋەلانىڭ ورتالىق قالاسى كاراكاسقا قونىپ، 100-دەن استام جاۋىنگەر مەن 35 توننا زات جەتكىزگەن. بۇعان دەيىن دە ۆەنەسۋەلادا رەسەي كۇشتەرىنىڭ بار ەكەنى تۋرالى ايتىلىپ كەلگەن ەدى.

“The Qazaq Times”