قاۋىپسىزدىك كەڭەسكە مۇشە بەس ەل ترامپتىڭ شەشىمىنە قارسى شىقتى

بۇۇ قاۋىپسىزدىك كەڭەسىندە ەۋروپا وداعىنا مۇشە 5 ەل ترامپتىڭ گولان جوتاسىن («گولان قورعانى» دەپ تە اتالادى) يزرايل تەرريتورياسى دەپ تانىعان شەشىمىنە نارازىلىق ءبىلدىردى.

قاۋىپسىزدىك كەڭەستىڭ تۇراقتى مۇشەسى بريتانيا مەن فرانتسيا جانە تۇراقتى ەمەس مۇشەسى گەرمانيا، بەلگيا، پولشا قاتارلى ەلدەر قۇراما شتاتتاردىڭ پرەزيدەنتى دونالد ترامپتىڭ گولان جوتاسى تۋرالى شەشىمىن حالىقارالىق ەرەجەلەرگە قايشى جاسالعان دەپ باعالادى.

بەس مەملەكەتتىك ورتاق مالىمدەمەسىندە قارۋلى كۇشپەن باسىپ العان جانە كۇشپەن اننەكتسيالاۋدىڭ حالىقارالىق ەرەجەلەرگە ساي ەمەس ەكەنىن، گولان جوتاسى ءالى دە يزرايلگە ءتان ەمەستىگىن كورسەتكەن. «ايماقتى كۇش قولدانا وتىرىپ اننەكتسيالاۋ حالىقارالىق زاڭدارعا قايشى. بىرجاقتى شەكارا جاريالاۋ حالىقارالىق زاڭدار مەن بۇۇ قاۋلىسىندا مويىندالماعان»، – دەلىنگەن مالىمدەمەدە.

اتالعان ەۋروپالىق ەلدەر يزرايل ۇكىمەتى گولان جوتاسىن كۇشپەن اننەكتسيالاۋدى باستاسا، بۇل حالىقارالىق داعدارىسقا الىپ كەلۋى مۇمكىن ەكەنىن ەسكەرتەدى.

ايتا كەتەيىك، سۇرياعا تاۋەلدى گولان جوتاسى 1967 جىلعى 6 كۇندىك سوعىستا يزرايل جاعىنان كۇشپەن باسىپ الىنعان. 1981 جىلى يزرايل بۇل ايماقتا ءوز ازاماتتارىن قونىستاندىرا باستادى. 2016 جىلى يزرايل ۇكىمەتى گولان جوتاسىن بىرجاقتى ءوز تەرريتورياسى رەتىندە جاريالادى. بۇل يزرايل مەن ماڭىنداعى اراب ەلدەرى اراسىنداعى قايشىلىقتى ءتىپتى دە اسقىندىردى. بىرنەشە كۇن بۇرىن يزرايل پرەمەر-مينيسترىمەن كەزدەسكەن اقش پرەزيدەنتى گولان جوتاسىن يزرايل تەرريتورياسى دەپ تانيتىن قۇجاتقا قول قويدى. بۇل حالىقارالىق داۋ تۋدىرعان شەشىمگە اينالدى.

“The Qazaq Times”