نەتانياحۋ مەن ترامپ كەزدەستى. فوتو: VOA.

يزرايل پرەمەر-ءمينيسترى بەنيامين نەتانياحۋمەن رەسمي كەزدەسۋدەن كەيىن، اقش پرەزيدەنتى دونالد ترامپ گولان قورعانىن ءيزرايلدىڭ مەنشىگى رەتىندە مويىندايتىن قۇجاتقا قول قويدى. حالىقارالىق قاۋىمداستىق قازىرگە دەيىن گولان قورعانىن ەۆرەي ەلىنىڭ تەرريتورياسى دەپ مويىنداعان ەمەس. ترامپتىڭ بۇل ءىسى ءۇشىن ءوز كەزەگىندە ەۆرەي ەلىنىڭ باسشىسى شەكسىز العىسىن بىلدىرگەن.

گولان ايماعى يزرايل مەن ءسۇريا اراسىنداعى تالاستى ايماق. 1967 جىلعى التى كۇندىك سوعىستا يزرايل بۇل ايماقتى باسىپ العان. 1981 جىلعا كەلگەندە يزرايل گولان قورعانىن ءوز تەرريتورياسى رەتىندە اتاي باستادى. بۇل رەت قۇراما شتات اتالعان تالاستى تەرريتوريانى ەۆرەيلەر جاعىنا جىعىپ بەرگەنىمەن قويماي، پرەزيدەنت ترامپ سوزىندە: «بۇل شەشىم ونداعان جىل بۇرىن قابىلدانۋى كەرەك ەدى»، – دەگەن.

تالاستاعى تەرريتوريا گولان قورعانى. فوتو: AFP/BBC.

بۇل ايماقتىڭ يەلىك قۇقىعى تۋرالى ەۋروپا وداعىنىڭ مايا كوسيانچيچ رەسمي مالىمدەمە جاساپ، ەو گولاندى ەجەلدەن يزرايل تەرريتورياسى دەپ تانىمايتىنىن ايتقان. قازىر گولان قورعانىندا 30-عا جۋىق يزرايلدىك ەلدى مەكەن بار، ولاردا شامامەن 20 مىڭعا جۋىق تۇرعىن ءومىر سۇرەدى. حالىقارالىق ەرەجەلەرگە نەگىزدەلگەندە بۇل ەلدى مەكەندەر زاڭسىز دەپ سانالادى. تالاستى ايماقتا ەۆرەيلەرمەن قاتار سۇريالىقتاردا تۇرادى.

پارسى شىعاناعىنداعى اراب ەلدەرى – ساۋد ارابياسى، كۋۆەيت، باحرەين اقش-تىڭ بۇل شەشىمىن ايىپتادى. بۇعان دەيىن رەسەي ءسىم-ءى ارنايى مالىمدەمە جاساپ، گولان ايماعىن سۇرياعا تيەسىلى ەكەنىن ايتقان. تۇركيا  سىرتقى ىستەر مينيسترلىگى دە ترامپ شەشىمىنە قارسى شىعىپ، بۇۇ ارقىلى اقش شەشىمىنە قارسى ارەكەت جاسايتىنىن مالىمدەدى.

ءسۇريا بيلىگى ترامپتىڭ شەشىمىن ءوز شەكاراسىنا قول سالۋ دەپ باعالادى. ال، وسىدان 3 جىل بۇرىن يزرايل بيلىگى گولان قورعانىن ەۆرەي مەملەكەتىنىڭ تەرريتورياسى رەتىندە رەسمي جاريالاعان بولاتىن. ول تۇستا اقش پرەزيدەنتى باراك وباما يزرايل ارەكەتىنە الاڭداۋشىلىق ءبىلدىرىپ، ماسەلەنى بۇۇ قاۋىپسىزدىك كەڭەسىنىڭ شەشىمىنە قاراتقان ەدى.

“The Qazaq Times”