كورنەكى سۋرەت. فوتو: http://mfa.gov.kz

قازاقستان مەن گەرمانيا اسكەري ىنتىماقتاستىق ورناتتى. بۇل تۋرالى قر قورعانىس مينيسترلىگىنىڭ رەسمي سايتى جاريالادى.

قورعانىس مينيسترلىگىنىڭ حالىقارالىق ىنتىماقتاستىق دەپارتامەنتىنىڭ باستىعى ولجاس حۋساينوۆ باستاعان اسكەري دەلەگاتسيا بەرلين قالاسىندا كەلىسسوزدەر وتكىزدى. قوس تاراپ قازاقستان مەن گەرمانيانىڭ قورعانىس ۆەدومستۆولارى اراسىنداعى 2019 جىلعى اسكەري ىنتىماقتاستىق جوسپارى جانە اسكەري ءبىلىم بەرۋ سالاسىنداعى ماسەلەلەر تالقىلاعان.

كەلىسسوز قورىتىندىسى بويىنشا، گەرمانيا قارۋلى كۇشتەرىنىڭ اسكەري قيمىلداردى مودەلدەۋ جانە اسكەري مەديتسينا سالاسىندا تسيفرلىق مونيتورينگ جۇيەسىن پايدالانۋدى ۇيرەنۋ ماقساتىندا ارنايى جاساق بولىمشەلەرى اراسىندا تاجىريبە الماسۋ تۋرالى كەلىسىمدەرگە قول قويىلدى. سونىمەن قاتار، ەكى ەلەدىڭ ۆەريفيكاتسيالىق ورتالىقتارى اراسىنداعى ءوزارا ىقپالداستىق جانە بىتىمگەرلىك قىزمەت ماسەلەلەرى قارالدى.

ايتا كەتەيىك، گەرمانيا قازاقستاننىڭ ەڭ ءىرى ءۇش ساۋدا ارىپتەسىنىڭ قاتارىنا كىرەدى. 2017 جىلى شىلدەدە قازاقستان مەن گەرمانيا ىسكەرلىك كەڭەسىنىڭ وتىرىسىندا قۇنى 872 ملن ەۋروعا باعالاناتىن 21 كەلىسىمگە قول قويىلدى.

"The Qazaq Times"