فوتو: nightcitylights.

بۇگىن قر جاڭا پرەزيدەنتى قاسىم-جومارت توقاەۆ انت قابىلداۋ راسىمىندە استانانىڭ اتاۋىن "نۇرسۇلتان" دەپ وزگەرتۋدى ۇسىندى.

ء"بىز قازاقستان رەسپۋبليكاسىنىڭ تۇڭعىش پرەزيدەنتى نۇرسۇلتان ءابىشۇلى نازارباەۆتىڭ ەسىمىن ماڭگىلىك ەتۋىمىز كەرەك. وسى ماقساتتا ەلوردامىزدىڭ اتاۋىن تۇڭعىش پرەزيدەنتىمىزدىڭ اتىمەن اتاۋدى ۇسىنامىن. بۇل بۇعان دەيىن ۇسىنىلعان ەدى. اتاپ ايتساق، قر تاۋەلسىزدىگىنىڭ 25 جىلدىعىنا وراي 2016 جىلى 23 قاراشادا قابىلدانعان دەكلاراتسيادا پارلامەنت دەپۋتاتتارى ايتقان ەدى", - دەدى قاسىم-جومارت توقاەۆ.

سونداي-اق، توقاەۆ رەسپۋبليكاداعى قالالاردىڭ ورتالىق كوشەلەرىنىڭ اتاۋىن دا نۇرسۇلتان نازارباەۆتىڭ اتىنا بەرۋدى ۇسىندى. سونىمەن بىرگە، عيماراتتار مەن كابينەتتەردەگى قر تۇڭعىش پرەزيدەنتىنىڭ پورترەتتەرى الىنبايتىنىن اتاپ ءوتتى.

ايتا كەتەيىك، بۇگىن قر پارلامەنتى پالاتالارىنىڭ بىرلەسكەن وتىرىسىندا قر پرەزيدەنتى قاسىم-جومارت توقاەۆ انت قابىلدادى. ال، كەشە 19 ناۋرىز 2019 جىلى تىكەلەي ەفير ارقىلى جولداۋ جاساعان قر پرەزيدەنتى ن. نازارباەۆ ءوز وكىلەتتىلىگىن توقتاتاتىنى تۋرالى شەشىمىن جاريا ەتكەن ەدى. ن. نازارباەۆ سوزىندە قازاقستان رەسپۋبليكاسىنىڭ پرەزيدەنتى مىندەتىن اتقارعان ۋاقىتتاعى قاداۋ-قاداۋ تاريحي بەلەستەر تۋرالى توقتالا كەلىپ، ەڭ جوعارى لاۋازىمدى قىزمەتتەگى كەزىندە حالقىنىڭ وزىنە سەنىم ارتقانىنا العىسىن ءبىلدىردى.

"The Qazaq Times"