قاندى وقيعادان كەيىن جاڭا زەلانديا قارۋ تۋرالى زاڭعا وزگەرىس ەنگىزبەك

جاڭا زەلانديا مەشىتتەرىندە بولعان قاندى وقيعادان كەيىن بيلىك ەلدەگى قارۋ پايدالانۋ تۋرالى زاڭعا وزگەرىس ەنگىزەتىنىن مالىمدەدى. بۇل تۋرالى ەل باسشىسى جاسيندا اردەرن حانىم كەزەكتى مالىمدەمەسىندە ايتقان بولاتىن. «ۇرەيدى ۇشىرعان قاندى وقيعادان كەيىن ون كۇن ىشىندە قارۋ تۋرالى زاڭدى وزگەرتەمىز»، – دەدى ەل پرەمەرى.

وتكەن اپتادا كرايستچەرچ قالاسىندا ەكى مەشىتكە جاسالعان تەررورلىق شابۋىلدان 50 ادام قازا تاۋىپ، 34 ادام جاراقات العان ەدى. قارۋلى كۇدىكتى ەڭ الدىمەن «ءال-نۇر» مەشىتىنە باسىپ كىرىپ، جۇما نامازىندا تۇرعان 300-گە جۋىق ادامعا وق جاۋدىرعان بولاتىن.  بۇدان كەيىن قارۋلى ەر ادام 5 شاقىرىم جەردەگى ەكىنشى مەشىتكە دە شابۋىل جاسايدى. مالىمەتتەردە، لينۋد مەشىتىندە 100-گە جۋىق ادام جۇما نامازىندا بولعان. قىلمىس كۇدىكتىسى وسى ارەكەتتەرىن «فەيسبۋك» جەلىسى ارقىلى تىكەلەي ەفيردە تاراتقان.

جاڭا زەلانديا پوليتسياسى كىسى ءولتىرۋ قىلمىسى بويىنشا 28 جاستاعى اۆستراليالىق ازامات برەنتون تاررانتكانى تۇتقىندادى. ول شابۋىل جاساۋدىڭ الدىندا قولىنا قارۋ الىپ، «اشىنعان ۇلتشىل» ەكەنىن ايتىپ،  ميگرانتتارعا قارسىلىعىن بىلدىرگەن. برەنتون تاررانتكانىڭ 2017 جىلى قارۋ پايدالانۋ كۋالىگىن العانى، ءارى بەس بىردەي تاپانشاسىنىڭ بار ەكەنى انىقتالعان. بۇل تاپانشالاردى سول ەلدەگى Gun City اتتى قارۋ دۇكەنىنەن ساتىپ العانى دا ءمالىم بولدى. الايدا، اتالعان دۇكەن تەررورلىق شابۋىل كەزىندە پايدالانعان قارۋلاردى ساتپاعانىن ايتادى.

جاڭا زەلانديامەن قاتار بۇكىل الەمدى دۇرلىكتىرگەن بۇل وقيعادان كەيىن، ەل بيلىگى ازاماتتاردىڭ قارۋ پايدالانۋ ەركىندىگى تۋرالى زاڭعا شۇعىل تۇردە وزگەرىس ەنگىزەتىنىن جەتكىزىپ وتىر.

“The Qazaq Times”