يزرايل باسشىسى كەيبىر اراب ەلدەرىمەن قۇپيا بايلانىس ورناتقاندارىن ايتتى

ەۆرەي مەملەكەتىنىڭ پرەمەر-ءمينيسترى بەنيامين نەتانياحۋ ءيزرايلدىڭ كەيبىر اراب ەلدەرىمەن قۇپيا بايلانىس ورناتىپ وتىرعانىن ايتتى. يزرايل مەن اراب ەلدەرى اراسىنداعى سوعىس كەزىندە جاۋلاسقان ەلدەردىڭ بىرقاتارى بۇگىندە يزرايلمەن جاسىرىن تۇردە تىعىز قارىم-قاتىناس ورناتىپ كەلە جاتقانىن جەتكىزگەن.

نەتانياحۋ بۇنداي مالىمدەمەنى 1967 جىلعى سوعىس كەزىندەگى يزرايل پرەمەرى لەۆي ەشكولدى ەسكە الۋ جيىنىندا ايتقان. ول سوزىندە: «ءبىر مەزەت «دۇشپان» رەتىندە باعالانعان بىرقاتار اراب ەلدەرىمەن بۇگىندە جاقىن قارىم-قاتىناس جاساپ وتىرمىز. وزگە كورشىلەس ەلدەرمەن دە بايلانىستى جاقسارتۋعا تىرىسامىز، بىراق بارلىق اراب ەلدەرىمەن ەمەس»، – دەگەن.

ەۆرەي ەلىنىڭ باسشىسى التى اراب ەلىمەن جاقىن قارىم-قاتىناس قۇپيا تۇردە جۇزەگە اسىپ كەلە جاتقانىن، الايدا ولاردىڭ اتىن اتاپ بەرە المايتىنىن جەتكىزگەن.

يزرايل مەن پالەستينا ماسەلەسى ورتا-تاياۋ شىعىستىڭ ەڭ كۇردەلى ءارى تەرەڭ قايشىلىعى. بۇل مادەنيەت پەن ءدىننىڭ جانە كۇردەلى ۇلتتىق-الەۋمەتتىك، ەكونوميكالىق قايشىلىقتاردىڭ تۇيىنشەگى. دەگەنمەن، سوڭعى جىلدارى بىرقاتار اراب ەلدەرىنىڭ پالەستينانىڭ ازاتتىعى جونىندەگى ۇستانىمدارىنان تايقىپ كەتكەنى ايتپاسا دا بەلگىلى.

قۇراما شتات تارابى ترامپ اكىمشىلىگى بيلىككە كەلگەننەن كەيىن ورتا شىعىستا بىرقاتار جاڭا ستراتەگيالاردى جۇزەگە اسىرۋعا تىرىسۋدا. سونىڭ ىشىندە وزىنە وداقتاس اراب ەلدەرى مەن يزرايل اراسىندا اشىق ديالوگتاردى دا ۇيىمداستىرىپ كەلەدى. بۇعان مىسال رەتىندە 13 اقپاندا ۆارشاۆادا وتكەن «ورتا شىعىستىڭ تۇراقتىلىعى مەن قاۋىپسىزدىك بولاشاعىنا قولداۋ كورسەتۋ» اتتى كونفەرەنتسياسىن ايتۋعا بولادى. اقش باس بولعان شارادا ساۋد ارابياسى، كاتار، باحرەين، ومان، يەمەن جانە بىرىككەن اراب امىرلىگىنىڭ باسشىلارى مەن يزرايل باسشىلارى ورتاق تالقى وتكىزگەن بولاتىن.

“The Qazaq Times”