يران يسلام ەلدەرىن پالەستينانىڭ ازاتتىعى ءۇشىن كۇرەسكە شاقىردى

ءبىر كۇن بۇرىن، يران استاناسى تەگەراندا «پالەستينا ينتيفاداسىن قولداۋ» اتتى حالىقارالىق كونفەرەنتسيا ءوتتى. بۇل كونفەرەنتسيا وسىمەن التىنشى رەت ۇيىمداستىرىلىپ وتىر. تالقى كەڭەسىنە قاتىسقان ءار قايسى تاراپ، يسلام الەمىنىڭ بىرلىگىن پالەستينانىڭ جەڭىسكە جەتۋ جولى دەپ اتادى. بۇل تۋرالى "پارسى-اقپارات" حابارلاپ وتىر.

كونفەرەنتسياعا قاتىسقان رەسەي شيتتەر قوعامىنىڭ باسشىسى نيزامي بالوگلانوۆ، يران يسلام رەۆوليۋتسياسىنىڭ جەتەكشىسى اياتوللا حامەنەيدىڭ بايانداماسىن القادى. ول سوزىندە: « يسلام رەۆوليۋتسياسىنىڭ جەتەكشىسى بۇل جولى، سيونيزم رەجيمىنىڭ پالەستيناعا قارسى قاستاندىقتارىن ەسكە سالىپ، الەمدىك سيونيزم دەگەن سۇم قۇبىلىسقا قارسى كۇرەسۋ ستراتەگياسىن جاسادى»، – دەگەن بولاتىن. ول جانە يران اقپارات قۇرالدارىنا بەرگەن سۇحباتىندا: «يران يسلام رەسپۋبليكاسىنىڭ ىرگەتاسىن قالاۋشى يمام حومەيني قۇدس الەمدىك كۇنىن بەلگىلەپ، پالەستينانى يسلام الەمىنىڭ باستى ماسەلەسى رەتىندە قالىپتاستىردى. سوندىقتان يسلام ەلدەرى باسقىنشىلاردىڭ تورىنا تۇسكەن پالەستينالىقتارعا كومەكتەسۋ ءۇشىن وسى ساياساتتى ۇلگى تۇتۋى  كەرەك. دايش پەن دجابحات ان-نوسرات سىندى لاڭكەستىك توپتار يسلام الەمىندەگى پالەستينا ماسەلەسىن ۇمىتتىرۋدى كوزدەگەن ءيزرايلدىڭ قاستاندىق جوبالارىنىڭ ماڭىزدى ءبولىمى»، – دەگەن كوزقاراسىن ايتقان.

كەڭەسكە قاتىسقاندار، قازىرگى تاڭدا يسلام ەلدەرىنىڭ كۇش-قۋاتى يزرايل مۇددەسىنە قۇرىلعان لاڭكەستىك توپتارمەن كۇرەسۋگە جۇمسالىپ وتىرعانىن، وسى الەمدى دۇبىرگە سالعان لاڭكەستىك توپتاردى ءيزرايلدىڭ دايىنداپ، يسلام ەلدەرىنە قارسى ايداپ سالعانىن، ال الەم بولىپ وسى لاڭعا ىلەسىپ، شىن مانىسىندەگى پالەستيناعا جاسالعان قياناتتى ۇمىتىپ بارادى دەگەن پىكىرگە توقتالدى. شىندىعىندا، «دايش» قاتارلى لاڭكەستىك توپتاردىڭ ارەكەتى كۇشەيگەن كەزدەردە يزرايل مەملەكەتى پالەستينا جەرىندەگى قالاشىقتار قۇرىلىسىن جەدەلدەتە ءتۇستى. اقش، ەۋروپا ەلدەرىنىڭ ءبارى ءيزرايلدى قولداپ، ونىڭ شەكارالىق سۇعاناقتارىنا كوز جۇمعانىمەن، يسلام ەلدەرىنىڭ بوسقىندارىنىڭ ءوز ەلدەرىنەن پانا سۇراۋىنا توسقاۋىل بولىپ وتىر. سيونيزمنىڭ تاقىرىبىن تاراتىپ ايتپاساق تا، وتكەن عاسىردىڭ 90 جىلدارىنان بەرى قاراي ورتا-شىعىستاعى دۇربەلەڭنىڭ تۇپكى سەبەبى نە ەكەنىن بارىمىزگە ايان.

“The Qazaq Times”