تۇركيا اۋعانستان ماسەلەسىنە ارالاسۋى مۇمكىن

اقش پەن رەسەيدىڭ اۋعانستان ءىسى جونىندەگى ارنايى وكىلدەرى انكارادا كەزدەسىپ، اۋعانستان جانە وڭىردەگى قاۋىپسىزدىك پەن تۇراقتىلىق ماسەلەسىن تالقىعا سالعان بولاتىن. اۋعانستانداعى داعدارىستى شەشۋدىڭ كەزەك كۇتتىرمەيتىن ماسەلە ەكەنىن ايتقان وكىلدەر، ماسەلەگە وڭىردەگى نەگىزگى ويىنشىلاردىڭ دا ات سالىسۋىن تالاپ ەتكەن.

انكارادا رەسەي پرەزيدەنتىنىڭ اۋعانستانداعى ارنايى وكىلى زامير كابۋلوۆ تۇركيانىڭ سىرتقى ىستەر مينيسترلىگى وڭتۇستىك ازيا ءىسى جونىندەگى ارنايى وكىلى ريزا حاكان تەكينمەن كەزدەسۋ وتكىزدى. كەزدەسۋدە تۇركيانىڭ وڭىردەگى ءرولىن باسا ءسوز ەتكەن كابۋلوۆ انكارا وكىلدەرىن الداعى ۋاقىتتا وتەتىن ماسكەۋدەگى جينالىسقا ۇسىنىس ەتكەن.

«اۋعانستان ماسەلەسىندە تۇركيا ماڭىزدى ويىنشىنىڭ ءبىرى، سونداي-اق، اۋعانستان داعدارىسىن شەشۋدە ورىنى بار»، – دەگەن كابۋلوۆ كەزدەسۋدە.

اۋعانستانداعى سىرتقى كۇشتەر مەن تالىپتەر اراسىندا كەلىسسوزدەر جۇرە باستاۋى وڭىردەگى بىرقاتار ەلدىڭ بەلسەندىلىگىن وياتتى. رەسەي مەن اقش اۋعان جەرىندەگى كۇشتەرمەن كەلىسسوزدەردى باسەكەلەسە وتكىزدى دەۋگە دە كەلەتىندەي. پاكىستان، يران، كاتار جانە تۇركيا قاتارلى ەلدەر دە اۋعانستان ماسەلەسىن شەشۋدە وزدەرىنىڭ ءرولىنىڭ بار ەكەنىن كورسەتۋگە تىرىسۋدا.

انكارا اقش پەن رەسەيدىڭ اۋعانستان ءىسى جونىندەگى وكىلدەرىن شاقىرىپ، كەزدەسۋ وتكىزۋى تۇركيانىڭ وڭىرلىك ماسەلەدەگى ورنىن ايقىنداۋىنا سەپتىگى ءتيدى. سوڭعى كەزدەردەگى ءسۇريا ماسەلەسى، كاتار داعدارىسى، يران تاقىرىبى، اۋعانستان ماسەلەسىندە بەلسەندىلىك تانىتۋ ارقىلى تۇركيا وڭىردەگى ىقپالىن كورسەتۋگە تىرىسۋدا.

“The Qazaq Times”