اقش زەرتتەۋشىلەرى ترامپ بيلىگىنە تايۆانمەن ەركىن ساۋدا كەلىسىمىن جاساسۋدى ۇسىندى

جاقىندا اقش-تىڭ عىلىمي-زەرتتەۋ ينستيتۋتى 2049 جوباسى بويىنشا جاساعان بايانداماسىندا، اقش-تىڭ تايۋانمەن (تايۆان) ەركىن ساۋدا قاتىناسىن قۇلشىنىس جاساۋى كەرەك دەپ تاپتى. زەرتتەۋ ناتيجەسىنە قاراعاندا، اقش-تايۋان اراسىندا ەركىن ساۋدا كەلىسىمى جاسالاتىن بولسا، بۇل نەگىزگى ستراتەگيالىق مۇددەلەرگە يە بولىپ، قوس تاراپقا بىردەي پايداسىن اكەلمەك.

«تايۋانمەن ەركىن ساۋدا قاتىناسىن ورناتۋدىڭ التىن ورايى» اتتى بۇل باياندامادا ايتىلۋىنشا، اقش-تايۋان ەركىن ساۋدا قاتىناسى قۇراما شتاتتىڭ ستراتەگيالىق مۇددەلەرىن العا ىلگەرىلەتىپ قانا قويماي، تايۋاننىڭ قىتاي حالىق رەسپۋبليكاسىنداعى مارتەبەسىن دە كوتەرەدى.

باياندامادا: «اقش يننوۆاتسيالىق ەكونوميكالاردى باسقاراتىن بولاشاق زاڭدارعا، ەرەجەلەرگە جانە ساياساتتارعا ارنالعان ۇلگىلەردى قۇرۋ ءۇشىن ازياداعى جوعارى تەحنولوگيالىق ەكونوميكا سانالاتىن تايۋانمەن كەلىسىمگە قول جەتكىزۋ قاجەت»، – دەگەن تۇجىرىم جاساعان.

باياندامادا بۇل كەلىسىمنىڭ تاراپتارعا اكەلەتىن پايداسى تۋرالى مىناداي ءۋاج ايتادى: «ەكى ەلدىڭ قورعانىس ونەركاسىبى، ەنەرگەتيكا جانە بولاشاق ستراتەگيالىق تەحنولوگيالار سالاسىنداعى تىعىز ىنتىماقتاستىعى ەركىن ساۋدا كەلىسسوزدەرىنە ۇلكەن ىنتالاندىرۋدى قامتاماسىز ەتەدى جانە ترامپ اكىمشىلىگىنىڭ ءۇندى-تىنىق مۇحيتى ايماعىنداعى ستراتەگياسىن دامىتۋعا كومەكتەسەدى». سونداي-اق، ىنتىماقتاستىق ەكى ەلگە ورتاق قاتەرلەرگە توتەپ بەرىپ، ايماقتاعى ءتارتىپتى ساقتاۋعا ىقپال ەتەدى.

دەگەنمەن، باياندامادا اتالعان كەلىسىمگە كەلۋ بارىسىندا ەكى تاراپ ورتاسىندا اۋىلشارۋاشىلىق جانە زياتكەرلىك مەنشىك قۇقىعى ماسەلەسىندە پروبلەمالاردىڭ پايدا بولاتىنىن دا جوققا شىعارمايدى.

ارينە، اقش پەن تايۋان ەركىن ساۋدا كەلىسىمىنە قانشالىقتى مۇددەلى بولعان كۇندە دە، بۇل ماسەلەدە بەيجىڭ تارابىنىڭ قارسىلىعىن دا ەسكەرۋسىز قالدىرا المايدى. رەسمي بەيجىڭ تايۋاندى دەربەس ەل رەتىندە وزگە مەملەكەتتەرمەن ەكىجاقتى كەلىسىم جاساسۋىنا جول بەرگىسى كەلمەيدى. بۇل باستاما اقش جاعىنان كوتەرىلگەن كۇندە دە سوڭعى بارىپ اقش-قىتاي قايشىلىعىنىڭ كۇشەيە تۇسۋىنە اپارىپ سوعۋى دا مۇمكىن.

“The Qazaq Times”