ماحمۇد ابباس يزرايلگە ەسكەرتۋ جاسادى

پالەستينا باسشىسى ماحمۋد ابباس يزرايلگە قاراتا ەسكەرتۋ جاسادى. يزرايل تارابىنىڭ پالەستينا حالقىنا جانە قاسيەتتى قۇندىلىقتارىنا قارسى زاڭ بۇزۋشىلىق ارەكەتتەرگە بارعانىن، وڭىردە دىنارالىق قاقتىعىستى ورشىتە تۇسكەنىن ايىپتادى.

ماحمۋد ابباس سوزىندە: «پالەستينا حالقىنا، مۇسىلماندار مەن حريستيانداردىڭ قاسيەتتى قۇندىلىقتارىنا جاسالعان قيانات، پالەستينالىق شەيىتتەر مەن تۇتقىنداعى ازاماتتارىنا، ولاردىڭ وتباسىنا بولىنگەن قاراجاتتى قىسقارتۋ ارقىلى يزرايل بيلىگى ءوز ناسىلشىلدىگىن تانىتتى. سونىمەن بىرگە ورتاداعى بارلىق كەلىسىمدى بۇزدى»، – دەدى.

پالەستينا باسشىسى يزرايل اسكەرلەرىنىڭ ءال-اقسا مەشىتىنە پالەستينالىقتاردى كىرگىزبەۋى وڭىردەگى ءدىني قاقتىعىستى قاساقانا ءورشىتۋ ەكەنىن ايتادى.

يزرايل اسكەرلەرى وسى اپتانىڭ باسىندا ءال-اقسا مەشىتىنىڭ شىعىس قاقپاسىن جاۋىپ، تەمىر تورمەن قورشاعان. بۇل پالەستينالىق مۇسىلمانداردىڭ نارازىلىق شەرۋىنە اپارىپ سوقتى. نارازى توپ پەن قارۋلى كۇشتەر اراسىندا قاقتىعىس ورىن الدى. يزرايل تارابى بەلسەندىلەردى تەرگەۋگە العان.

“The Qazaq Times”