انكارادا اقش پەن رەسەيدىڭ اۋعانستانداعى وكىلدەرى كەزدەسپەك. فوتو: csrs kabul.

اقش پەن رەسەيدىڭ اۋعانستانداعى ارنايى وكىلدەرى  تۇركيادا كەزدەسپەك. 22 اقپان كۇنى انكارادا وتەتىن كەزدەسۋدە اۋعانستانداعى بەيبىتشىلىك پروتسەسى تالقىعا سالىنباق. بۇل تۋرالى "انادولى" اقپارات اگەنتتىگى حابارلادى.

اقش-تىڭ اۋعان جەرىندەگى ارنايى وكىلى كاتاردىڭ دوحا قالاسىندا تاليبان وكىلدەرىمەن كەلىسسوز وتكىزگەننەن كەيىن، ماسكەۋ تارابى 5 اقپاندا تالىپتەر مەن اۋعانستاندىق ساياساتكەرلەر اراسىنداعى كەزدەسۋدى ۇيىمداستىردى. رەسمي مالىمەتتەردە بۇل كەلىسسوزدى رەسەيدەگى اۋعان دياسپورا وكىلدەرى ۇيىمداستىردى دەلىنگەن.

رەسەي مەن اقش اۋعانستان ماسەلەسى بويىنشا ءبىر-ءبىرىنىڭ ارەكەتتەرىن سىنعا الىپ كەلەدى. ايتالىق، رەسەيدىڭ اۋعانستانداعى وكىلى زامير كابۋلوۆ سوزىندە ترامپتىڭ اۋعانستانداعى سوعىستى توقتاتۋ شەشىمىنە قاراتا: "ترامپ اقىرى بۇل سوعىستى توقتاتۋ كەرەك ەكەنىن ءتۇسىندى. بىراق، بۇل سوعىس تۋرالى باعا بەرۋگە ءالى ەرتە", – دەدى.

ماسكەۋدە وتكەن كەلىسسوزدە تالىپتەرمەن سويلەسۋگە اۋعانستان ۇكىمەتىنىڭ رەسميلەرى قاتىسپادى.  اۋعانستان ماسەلەسىن شەشۋدە رەسەي مەن اقش-تىڭ ارەكەتتەرىن ۇيلەستىرۋ اسا ماڭىزدى. بۇل انكاراداعى كەزدەسۋدە بەلگىلى بولماق.

“The Qazaq Times”