![](https://qazaqtimes.com/kk/content/uploads/2019/02/9I3V9801-800x480.jpg?token=a2a07816318d784e7fe08d81c70ebf71)
قازاقستاندا ەندى لاشىقتا تۇرۋعا تىيىم سالىنباق. استە، قاعىس ەستىمەدىڭىز. قازاقستاندىقتارعا لاشىقتا تۇرۋعا تىيىم سالاتىن جاڭا زاڭ جوباسىن ۇكىمەت قاراۋىنا ەنگىزۋ كوزدەلۋدە. بۇل تۋرالى ىشكى ىستەر ءمينيسترىنىڭ ورىنباسارى يۋري يلين ۇكىمەتتىڭ كەزەكتى ءباسپاسوز ءماسليحاتىنىڭ بىرىندە ءمالىم ەتتى.
سونىمەن، يلين نە ايتتى دەيسىز عوي. اۋەلى ول قازاقستان زاڭى بويىنشا ءۇيدىڭ يەسى وزدىگىنەن مەنشىكتەرىن حالىققا قىزمەت كورسەتۋ ورتالىعىنا نەمەسە اكىمدىك ارقىلى تىركەۋى كەرەك دەگەندى العا تارتتى. قىزىق وسى جەردە. تىڭداپ كورىڭىز:
"بىلسەڭىزدەر، بۇرىن جەمقورلىق تۋرالى ماسەلەلەر پايدا بولاتىن. ول جەر ينسپەكتسياسى، ساۋلەت ماسەلەسى، گاز، توتەنشە جاعدايلار وكىلدەرىنەن رۇقسات كەرەك ەدى. ءبىز ولاردى ازايتقانبىز. ەندى مىنە، ناتيجەسىن كورىپ وتىرمىز. جوسىقسىز قۇرىلىسشىلار ۋاقىتشا لاشىقتار سوعادى، سوسىن ولاردى ادامدارعا تۇرۋعا وتكىزەدى", - دەدى ول.
نە ايتۋعا بولادى؟ تۇسىنسەڭىز، ىشكى ىستەر ءمينيسترىنىڭ ورىنباسارى ءۋاجى بويىنشا، ول اتاپ وتكەن جەمقورلىق پايدا بولاتىن جولداردى ازايتۋدىڭ ءوزى قاۋىپتى سياقتى. سەبەبى، «ەندى، مىنە، ناتيجەسىن كورىپ وتىرمىز» دەيدى مارتەبەلى ءيلينىڭىز. ال مۇنداعى «ناتيجەڭىز» استاناداعى بەس بالانىڭ ءولىمىن مەڭزەپ تۇرعانى انىق. مارتەبەلىڭىز سوندا كىمگە وكپەلى؟
وكپەلى دەمەكشى، مينيسترلىك وكىلى تۇرعىنداردىڭ قاۋىپسىزدىك ماسەلەسىنە تۇرعىن ءۇيدى تۇرعىزعاندار دا، ونى جالداۋعا بەرگەندەر دە، اينالىپ كەلىپ تۇرعىنداردىڭ ءوزى دە كىنالى ەكەنىن ايتتى. ياعني، استاناداعى قايعىلى وقيعاعا تەك قانا ۇكىمەت، تەك قانا مينيستر م. ابىلقاسىموۆا كىنالى ەمەس، لاشىقتا تۇرعان اتا-انالاردىڭ وزدەرى كىنالى دەيتىن سەكىلدى.
ايتپاقشى، سوسىن، «حان سارايىندا» وتىرعان يليندەردىڭ پايىمىنشا، البەتتە، بارىنە لاشىق كىنالى. ءسويتىپ، اش حالىقتىڭ قاسىعىنا اس تامىزىپ بەرۋدى ويلامايتىن ۇكىمەت ەندى قاسىعى تۇرىپتى، لاشىعىنان ايىرۋدى زاڭعا تىرەپ بارىپ توقتايتىنداي. تاعى دا تىڭداپ كورىڭىز:
ء"بىز رەسپۋبليكا بويىنشا ساراپتاما جاسايمىز، سوسىن لاشىقتى پايدالانۋعا تىيىم سالۋ ءۇشىن زاڭ جوباسىن ۇكىمەتكە ۇسىنامىز، – دەيدى.
بۇل دا ىشكى ىستەر ءمينيسترىنىڭ ورىنباسارى يۋري ءيليننىڭ ءسوزى. كۇلەسىز بە، جىلايسىز با؟!