بريتانيا ۇكىمەتى بىلتىر شىلدەدە قىتايلىق Huawei كومپانياسىنىڭ جابدىقتارى مەن تەحنولوگيالارى بريتانيانىڭ تەلەكوممۋنيكاتسيا جەلىسىنە قاۋىپ توندىرەدى دەپ مالىمدەگەن. قىتايلىق كومپانيا بۇل ماسەلەنى رەتكە سالۋ ءۇشىن 2 ملرد اقش دوللارى بولۋگە ۋادە بەرگەن بولاتىن.

وسى اپتادا Huawei كومپانياسىنىڭ باسقارۋشى ديرەكتورى ديڭ يۋن بريتانيانىڭ عىلىم جانە تەحنولوگيالار جونىندەگى كوميتەتتىڭ كوميسسيا مۇشەسىن حات جولداپ، بريتان ۇكىمەتى العا قويعان قاۋىپسىزدىك تالاپتارىن قامتاماسىز ەتۋ جانە ينجەنەرلىك پروتسەستەردى رەتتەۋ وتە كۇردەلى ءارى اۋرەشىلىككە تولى جوبا ەكەنىن، سونداي-اق، ونىڭ ناتيجەلەرىن كورۋ ءۇشىن 3-5 جىل ۋاقىت كەتەتىنىن ايتقان.

ديڭ يۋن حاتىندا: «Huawei ەشقاشان ءوز جابدىقتارىن تىڭشىلىققا كومەكتەسۋ ءۇشىن قولدانباعان. بۇل تۋرالى قىتاي سىرتقى ىستەر مينيسترلىگى دە «ۇلتتىق زياتكەرلىك مەنشىك تۋرالى زاڭدا» ەشقانداي كاسىپورىننان «رەسمي مىندەت جانە تىڭشىلىق جاساۋدى» تالاپ ەتپەيدى، ونىڭ ءتيىستى زاڭدىق ەرەجەلەرى شەتەل كومپانيالارى مەن قىتايلىق كومپانيالاردىڭ قىزمەتكەرلەرىنە شەتەلدە قۇقىقتىق اسەر ەتپەيدى»، – دەپ تۇسىندىرگەن.

بىلتىر شىلدەدە بريتانيا ۇكىمەتىنىڭ قاداعالاۋ ورگاندارى «Huawei كومپانياسى جەلىسىنىڭ قاۋىپسىزدىگىن باعالاۋ» ماقساتىندا كومپانيانىڭ ينجەنەرلىك جەلىسىن تەكسەرۋدەن وتكىزىپ، ۇلىبريتانيا ۇكىمەتىنىڭ بايلانىس ورتالىعى (GCHQ) قول قويعان ەسەپ جاريالادى. ەسەپكە سايكەس، «Huawei كومپانياسىنىڭ ينجەنەرلىك جەلىسىندەگى كەمشىلىكتەر «بريتاندىق تەلەكوممۋنيكاتسيا جەلىسىنە جاڭا قاۋىپ-قاتەر الىپ كەلەدى دەلىنگەن».

اتالعان ورتالىق سوڭعى 4 جىلدا قىتايلىق كومپانيانى جىل سايىن باقىلاپ كەلەدى. بريتاندىق اقپارات قۇرالدارىنىڭ حابارىنا قاراعاندا، Huawei ءوز ونىمدەرىنىڭ قاۋىپسىزدىگى تۋرالى الاڭداۋشىلىقتى ءالى دە رەتتەي الماي كەلەدى.

“The Qazaq Times”