جەمىس-جيدەك پەن كوكونىس ادام ءومىرىن ۇزارتادى

عالىمدار كۇنىنە 800 گرامم جەمىس-جيدەك پەن كوكونىستەردى قابىلداۋ ادامنىڭ ءومىر جاسىن ۇزارتاتىنىن دالەلدەپ شىقتى
ءار كۇندە 80 گراممنان 10 مارتە كوكونىس پەن جەمىس-جيدەكپەن قورەكتەنۋ ادامنىڭ ءومىر جاسىن ەداۋىر ۇزارتۋعا ىقپالىن تيگىزەدى.
لوندونداعى Imperial college عالىمدارىنىڭ ەسەبىنشە، ۇسىنىلعان ءادىس بويىنشا تاماقتانۋ 7,8 ملن-عا جۋىق مەزگىلسىز ءولىمنىڭ الدىن الۋى مۇمكىن.
ءبىر رەتتىك 80 گرامم، بۇل نەبارى ءبىر تال بانان، المۇرت نەمەسە ءۇش قاسىق بۇرشاق. بۇل كۇندەلىكتى تۇرمىستا قولدانىلاتىن جانە كەڭ تاراعان جەمىس، كوكونىس تۇرلەرى. ال ولاردى مۇمكىندىگىنشە كوپ پايدالانسا، سايكەسىنشە اعزاعا پايداسى دا ارتا بەرمەك، بۇل تۋرالى bbc.com حابارلادى.

200 گرامم كوكونىس پەن جەمىستى پايدالانۋ
جۇرەك-قان تامىرلارى اۋرۋلارىنان بولاتىن ءولىم دەڭگەيىن 13 % - عا
قاتەرلى ىسىك اۋرۋلارىنا شالدىعۋ دەڭگەيىن 4 % - عا
مەزگىلسىز ءولىم دەڭگەيىن 15% عا
800 گرامم كوكونىس پەن جەمىستى پايدالانۋ

جۇرەك-قان تامىرلارى اۋرۋلارىنان بولاتىن ءولىم دەڭگەيىن 28 % - عا
قاتەرلى ىسىك اۋرۋلارىنا شالدىعۋ دەڭگەيىن 13 % - عا
مەزگىلسىز ءولىم دەڭگەيىن 31% عا تومەندەتەدى.
بۇل ناتيجەلەر 22 ميلليون ادامنىڭ قاتىسۋىمەن ۇزاق ۋاقىت جۇرگىزىلگەن 95 ءتۇرلى ساراپتامالىق زەرتتەۋ ناتيجەلەرى بويىنشا الىنىپ وتىر. ال تولىققاندى زەرتتەۋ ناتيجەلەرى International Journal of Epidemiology باسىلىمىندا جاريالانعان. وسىعان دەيىن عالىمدار ءتۇرلى اۋرۋلاردىڭ پايدا بولۋ قاتەرىن تومەندەتەتىن كوكونىستەر مەن جەمىستەردى انىقتاعان بولاتىن. مىسالى، جاسىل جانە سارى ءتۇستى كوكونىستەر: ساۋمالدىق، بۇرىش جانە دە شارشىگۇلدى وسىمدىكتەردى، ونىڭ ىشىندە ءتۇستى قىرىققاباتتى پايدالانۋ قاتەرلى ىسىكتىڭ الدىن الۋعا ۇلكەن سەپتىگىن تيگىزەدى.
ال جۇرەك-قان تامىرلارى اۋرۋلارىن الدىن الۋ ءۇشىن الما، المۇرت، تسيترۋستى جەمىستەردى كوپتەپ پايدالانىپ، كرەستگۇلدى وسىمدىكتەردەن ءتۇرلى سالاتتاردى دايىنداپ جەگەن پايدالى.
سونىمەن قاتار، كوكونىس پەن جەمىستەردى كۇندەلىكتى پايدالانۋ اعزاداعى حولەستەرين دەڭگەيىن تومەندەتىپ، قان قىسىمىن قالىپتى نورمادا ۇستاپ، قان اينالىم جۇيەلەرىن رەتكە كەلتىرىپ جانە دە يممۋندىق جۇيەنى جاقسارتۋعا ىقپال ەتەدى. دۇنيەجۇزىلىك دەنساۋلىق ساقتاۋ ۇيىمى كەم دەگەندە تاۋلىگىنە بەس مارتە (400 گرامم شاماسىندا) كەز-كەلگەن، ءتىپتى مۇزداتىلعان، كوكونىس پەن جەمىستەردى قابىلداۋعا كەڭەس بەرەدى. دەگەنمەن، دارىگەرلەردىڭ ايتۋىنشا، جوعارىدا ايتىلعان كەڭەستەر بويىنشا تاماقتانۋعا كەز-كەلگەن ادامنىڭ ماتەريالدىق مۇمكىندىگى جەتە بەرمەيدى.

گاۋھار جاقىپباي

«The Qazaq Times»