ترامپ: مەنىڭ ويىمشا ءبىز قىتايمەن كەلىسىمگە كەلە الامىز

اقش پرەزيدەنتى دونالد ترامپ دۇيسەنبى كۇنى جاساعان مالىمدەمەسىندە، قۇراما شتاتتىڭ قىتايمەن ساۋدا كەلىسىمىنە قول جەتكىزەتىنىن، ناتيجەسىندە ساۋدا تەڭسىزدىگى توقتاتىلاتىنىن بولجاپ ايتتى.

«مەنىڭ ويىمشا، ءبىز قىتايمەن ساۋدا كەلىسىمىنە قول جەتكىزە الامىز. قىتاي دا كەلىسسوز جۇرگىزۋدى قالايدى»، – دەدى ترامپ اق ۇيدە جۋرناليستەرگە بەرگەن جاۋابىندا.

ارگەنتيناداعى كەزدەسۋدە ەكى ەل باسشىسى كەلىسكەن 90 كۇندىك كەلىسسوز مەرزىمىنىڭ جارتىسى ءوتىپ كەتتى. اقش پرەزيدەنتى بولسا ءوز ۇستانىمىندا تابانداپ تۇر. ايتالىق، ەگەر قىتاي تارابى مەنشىك قۇقىعىن قورعاۋعا، تەحنولوگيانى وتكەرىپ بەرۋگە ماجبۇرلەۋدى توقتاتۋعا، ساۋدا تەڭدىگىن ۇستانۋعا كەلىسىم بەرمەسە 2 ناۋرىزدان باستاپ 200 ملرد اقش دوللارى كولەمىندەگى قىتايلىق تاۋارلارعا كەدەندىك سالىقتى وسىرمەك.

وتكەن اپتادا ەكى تاراپ ورتا دەڭگەيدەگى كەلىسسوزدى بەيجىڭدە وتكىزدى. مالىمەتتەرگە قاراعاندا قوس تاراپ اقش ونىمدەرى مەن قىزمەتتەرىن ساتىپ الۋدى كوبەيتۋ، امەريكالىق كاسىپورىندارىنىڭ قىتاي نارىعىنا شىعۋىن  كەڭەيتۋ ماسەلەلەرىندە تابىستى كەلىسىمدەر جاساسقان. الايدا، قىتاي ۇكىمەتى سۋبسيديالارى سياقتى كۇردەلى قۇرىلىمدىق ماسەلەلەرگە قاتىستى كەلىسسوزدە سەرپىلىس جوق.

تاراپتار ەندى جوعارى دەڭگەيدەگى كەلىسسوزدى وسى ايدىڭ ىشىندە ۋاشينگتوندا وتكىزۋدى جوسپارلاپ وتىر. بۇل كەلىسسوز تاراپتاردىڭ ساۋدا قاقتىعىسىن رەتتەۋدە شەشۋشى ءرول اتقارادى دەپ بولجانۋدا. ال، پرەزيدەنت ترامپ تا قىتايمەن كەلىسسوزدىڭ ناتيجەلى بولاتىنىن بولجاپ وتىر.

“The Qazaq Times”