يتاليا سەناتى جاڭا بيۋدجەت جوباسىن قابىلدادى

يتاليا سەناتى كەلەر جىلدىڭ جاڭا بيۋدجەتىن قابىلدادى. بريۋسسەلمەن ءبىراز ۋاقىت بويى داۋ تۋعىزعان بيۋدجەت قاڭتاردا قولدانىسقا ەنبەك.

Reuters اگەنتتىگىنىڭ حابارلاۋىنشا، زاڭ جوباسىن 167 دەپۋتات قولداپ، 78-ءى قارسى داۋىس بەرگەن. سەنات قابىلداعان قۇجات ەندى يتاليا پارلامەنتىنىڭ تومەنگى پالاتاسىندا بەكىتىلۋى ءتيىس.

بيىل ماۋسىمدا ريم الەۋمەتتىك باعدارلامالارعا قاتىستى بيۋدجەت كولەمىن 0,9%-عا ۇلعايتۋدى ۇسىنىپ، بريۋسسەل ونى كەرى قايتارعان بولاتىن. سەبەبى ەكى تاراپ ۇسىنىسىنداعى ايىرماشىلىق 25 ميلليارد ەۋروعا جەتكەن. وسىعان دەيىن ەۋروكوميسسيا وداق قۇرامىنداعى ەلدەن العاش رەت بيۋدجەت جوباسىن تولىقتىرۋدى تالاپ ەتكەن بولاتىن.

ەۋروتوپ يتالياعا جاڭا بيۋدجەت جوباسىن دايىنداۋعا ءبىرا اپتا ۋاقىت بەرگەن. الايدا، يتاليا تاراپى بۇل ۇسىنىسقا تۇبەگەيلى قارسىلىق ءبىلدىردى. يتاليا ىشكى ىستەر ءمينيسترى ماتتەو سالۆيني «ەگەر ەۋروپاعا بۇل ۇناماسا، ريم ءبارىبىر ءوز قالاۋىن جۇزەگە اسىرادى» – دەپ مالىمدەگەن بولاتىن. ال ەۋروتوپ توراعاسى ماريو سەنتەنو يتاليانىڭ كەلەر جىلعى بيۋدجەتى ەۋروپالىق وداق تالاپتارىنا ساي كەلمەيتىنىن ايتىپ، 17 قاراشادا قارجىلاي كومەكتى قىسقارتۋ ماقساتىندا سانكتسيا ەنگىزۋ تۋرالى شەشىم شىعاردى. قاتاڭ قاۋلىنى جۇزەگە اسىرسا، يتاليا ەكونوميكاسى ەداۋىر قۇلدىراپ كەتۋى ىقتيمال. سول سەبەپتى مەملەكەت سەناتى ەۋروپالىق وداقتىڭ تالابىن ورىنداۋعا بەل بۋدى.

"The Qazaq Times"