كانادالىق CP-140 پاترۋلدىك ۇشاعى. فوتو: Global News.

اقش-تىڭ تالابىمەن قىتايلىق Huawei كومپانياسىنىڭ قارجى ديرەكتورى مىڭ ۋانجوۋ كانادادا تۇتقىندالعاننان كەيىن، كانادا مەن قىتاي قارىم-قاتىناسى شيەلەنىسە ءتۇستى. قوس تاراپتاردا ءبىر-بىرىنە قارسى مالىمدەمەلەر جاسالۋدا. ءبىر كۇن بۇرىن كانادانىڭ قورعانىس ۆەدومستۆوسىنىڭ باسشىسى جوناتان ۆەنس مالىمدەمە جاساپ، قازان ايىندا كانادالىق اسكەري ۇشاقتار سولتۇستىك كورەياعا جاقىن حالىقارالىق اۋە كەڭىستىگىندە قىتاي اسكەري ۇشاقتارىنىڭ قىسىمىنا ۇشىراعانىن ايتتى.

بۇل تۋرالى جوناتان ۆەنس كانادانىڭ حابار تاراتۋ كورپوراتسياسىنىڭ سۇحباتىن قابىلداعان كەزدە ورتاعا سالدى. ول بۇل ءىستى «قىتاي تارابىنىڭ ورەسكەل ارەكەتتەرىنىڭ سەرياسى» دەپ باعالاعان.

ول سوزىندە كانادالىق قورعانىس كۇشتەرى تىكەلەي قاۋىپكە ۇشىراماعانىن، دەگەنمەن، قىتاي اسكەري ۇشاقتارى ورىنسىز ارەكەتكە بارىپ ۋاقىتسىز ۋاقىتتا كانادالىق ۇشاقتارعا جاقىن كەلگەنىن ايتادى.

كانادا قورعانىس مينيسترلىگىنىڭ مالىمەتىنە قاراعاندا، CP-140 پاترۋلدىك ۇشاعى، بۇۇ-نىڭ 2375 جانە 2397 قارارلارىنا سايكەس، سولتۇستىك كورەياعا تەڭىزدەگى كونتراباندا ارەكەتتەرىنىڭ الدىن الۋ، اسىرەسە كەمەلەر اراسىنداعى تاۋار الماسۋدى قامتاماسىز ەتۋ ءۇشىن مونيتورينگ جۇرگىزىپ جاتقان.

كانادا تارابىنىڭ ايتۋىنشا، بەلگىسىز باعىتتا پايدا بولعان قىتاي اسكەري ۇشاقتارى  تۇسىنىكسىز راديو بايلانىسىن پايدالانعان. ۆەنستىڭ ايتۋىنشا، جاپونيا، اۋستراليا جانە جاڭا زەلانديا ۇشاقتارى دا اتالعان وپەراتسيالاردى جۇزەگە اسىرۋ كەزىندە قىتاي اسكەري ۇشاقتارىنىڭ قىسىمىنا ۇشىراعان.

“The Qazaq Times”