فرانتسيا: «يسلام مەملەكەتى» جويىلعان جوق

فرانتسيا قورعانىس مينيسترلىگى «يسلام مەملەكەتىنىڭ» جويىلماعانىن جانە ولاردىڭ ءالى كۇنگە دەيىن حالىق اراسىندا ەركىن جۇرگەنىن ايتتى.

سارسەنبىدە اقش پرەزيدەنتى دونالد ترامپ ءوزىنىڭ «Twitter» پاراقشاسىنا «يسلام مەملەكەتى» ەكسترەميستىك توبىنىڭ كۇيرەگەنىن» جانە «اقش اسكەرىنىڭ ءسۇريادا قالۋىنىڭ جالعىز سەبەبى يم-ءدى جەڭۋ» ەكەندىگىن جازعان بولاتىن. 19 جەلتوقساننان باستاپ اقش ءوز اسكەرىن ءسۇريادان شىعارا باستادى. وسىعان قاتىستى Reuters اگەنتتىگىنە سۇحبات بەرگەن فرانتسيا قورعانىس ءمينيسترى فلورەنس پارلي: «يم» قۇرامى بۇرىنعىدان السىرەي ءتۇستى. بىراق، بۇل ولاردىڭ ءسۇريا جەرىنەن تولىقتاي كەتكەنىن بىلدىرمەيدى. ولار الەمدىك كارتادان دا تۇبەگەيلى جويىلعان جوق. سول سەبەپتى ءبىز قاۋىپسىزدىك شارالارى مەن كۇرەستى توقتاتپاۋىمىز قاجەت. تەررورلىق توپتاردىڭ السىرەگەنىن پايدالانىپ، جويىپ جىبەرۋىمىز كەرەك»، – دەگەن. فلورەنس پارلي سۇحباتىندا فرانتسيانىڭ ستراسبۋرگ قالاسىندا ورىن العان قاقتىعىستى دا مىسالعا الدى. 11 جەلتوقساندا بەلگىسىز بىرەۋ ستراسبۋرگ ورتالىعىنداعى جارمەڭكەدە وق اتىپ، سالدارىنان 13 ادام جارالانعان. فرانتسيا بيلىگى بۇل جاعدايدى تەراكت دەپ اتاپ، 12 جەلتوقسان ستراسبۋرگتە ازا تۇتۋ كۇنى بولىپ جاريالاندى. كەيىننەن ادامدارعا وق جاۋدىرعان كۇدىكتىنىڭ «يسلام مەملەكەتىنىڭ» مۇشەسى ەكەندىگى انىقتالىپ، كوزى جويىلدى. اتالعان ەكسترەميستىك ۇيىم ستراسبۋرگتەگى شابۋىلدى ۇيىم سودىرى جاساعانى تۋرالى مالىمدەمە تاراتتى. «يم» وسىعان دەيىن ەۋروپانىڭ بىرنەشە ەلىندە بولعان تەراكتىلەردى موينىنا العان.

2015 جىلى پاريجدە ورىن العان ءىرى تەراكتىدەن كەيىن، فرانتسيادا قاۋىپسىزدىك شاراسى بارىنشا كۇشەيتىلدى. سوعان قاراماستان، سوڭعى ءۇش جىلدا بۇل ەلدە بىرنەشە تەراكت بولىپ، 200-گە جۋىق ادام قازا تاپقان.

ايتا كەتەيىك، «يسلام مەملەكەتى» 2013 جىلى ءسۇريا مەن يراك اۋماعىندا قۇرىلعان ەكسترەميستىك توپ. ولار بىرنەشە جىل بويى ەكى ەل اۋماعىنىڭ نەگىزگى بولىگىن باسىپ الىپ، حاليفات ورناتپاق بولعان. 2018 جىلدان باستاپ «يسلام مەملەكەتى» قۇلدىراي باستادى.

"The Qazaq Times"