پاكىستاندا جارىلىس ۇيىمداستىرعان لاڭكەستىك ۇيىم اياۋسىز جانىشتالدى

پاكىستاننىڭ بىرنەشە ايماعىندا ارنايى وپەراتسيا ءوتىپ، وتىردان استام سودىرلار ءولتىرىلدى. بۇل وپەراتسيالار سيند پروۆينتسياسى سەحۋان-شاريف قالاسىنداعى لال شاحباز كالاندار دەپ اتالاتىن سۇنيتتەر مەشىتىندە بولعان جارىلىستان ءبىر كۇننەن كەيىن ءوتتى.

جەرگىلىكتى ۇكىمەتتىڭ مالىمدەمەسىنە سۇيەنسەك، بۇل وپەراتسيا بارىسىندا سيند ماڭىنان كەمىندە 18 ادام اتىپ ولتىرىلگەن. ال، حايبەر-پاحتۋنحۋا جەرىندە 13 ادامنىڭ اتىلعانى بەلگىلى بولدى. «Associated Press»-ءتىڭ حابارىنا قاراعاندا، تەررورلىق ۇيىمعا قاتىسقان دەگەن كۇدىكپەن 47 ادام تۇتقىندالعان.

ەستەرىڭىزگە سالا كەتەيىك، وسىدان بۇرىن حابارلاعانىمىزداي، لال شاحباز كالاندار سۇنيتتەر مەشىتىندە جانكەشتى شابۋىل بولىپ، جارىلىس تۋىلعان ساتتە 50-گە جۋىق ادام قازا بولعان. قاتىستى اقپاراتتاردا قازا بولعاندار سانى ودان دا كوبىرەك كورسەتىلدى. جەرگىلىكتى تاراۋلاردىڭ ناقتى مالىمەتىندە 72 ادامنىڭ قازا تاۋىپ، 200-گە جۋىق ادامنىڭ ءتۇرلى جاراقات العانى ءمالىم بولدى. جارىلىستى «يسلام مەملەكەتى» تەررورلىق ۇيىمى ءوز ۇستىنە العان بولاتىن. قازىر وقيعاعا بايلانىستى وڭىردە قاۋىپسىزدىك شارالارى كۇشەيتىلدى. سيندتە بۇگىنمەن ءۇش كۇن بويى ازا بىلدىرىلۋدە. پاكىستاننىڭ پرەمەر-ءمينيسترى ناۆاز شاريف قارۋلى كۇشتەرگە جارىلىس تۋدىرۋشىلاردى تەز ارادا تاۋىپ، جازالاۋدى بۇيىرعان بولاتىن. حابارلانعان وپەراتسيا پرەمەر-ءمينيستردىڭ وسى بۇيرىعىمەن جاسالعان.

“The Qazaq Times”