فوتو: mtdata

تەرەزا مەيدىڭ جوسپارى پارلامەنتتە ماقۇلدانباسا، ۇلىبريتانيادا مەرزىمىنەن بۇرىن سايلاۋ وتەدى.

وسى اپتادا بريتانيا پارلامەنتىنىڭ قاۋىمدار پالاتاسى Brexit جوسپارىن سوڭعى رەت تالقىلاپ، شەشىم شىعارادى. ەگەر دەپۋتاتتار قارسى داۋىس بەرسە، بريتانيا وداق قۇرامىنان ۋاعدالاستىقسىز شىعادى. قۇجاتتى الدىن-الا تەكسەرىستەن وتكىزگەن دەپۋتاتتاردىڭ ءبىرازى يرلانديا رەسپۋبليكاسى مەن سولتۇستىك يرلانديا اراسىندا شەكارا رەجيمىن قۇرۋ ماسەلەسى تولىق شەشىلمەدى دەيدى. دەمەك، بريتانيانىڭ ەۋروپالىق وداق مۇشەلىگىنەن ەشبىر كەلىسىمسىز شىعۋى دا، وداق قۇرامىندا قالىپ قويۋى دا ىقتيمال.

بريتانيا پرەمەر-ءمينيسترى تەرەزا مەي: «كۇنى بۇگىنگە دەيىن Brexit جوسپارىن تالقىلاپ، ءبىراز وزگەرىستەر ەنگىزدىك. ەندىگى كەزەكتە ۇلىبريتانيا وداق قۇرامىنان شىعۋ ءۇشىن كەلىسىمدى شۇعىل ماقۇلداۋ كەرەك. پارلامەنت ناقتى بەكىتسە، قولعا العان ىستەرىمىز وڭىنان جۇزەگە اسپاق. ياعني بىرىككەن كورولدىككە تۇراقتىلىق قاجەت»، – دەدى.
ەرتەڭ ۇلىبريتانيا ۇكىمەتى ماقۇلداعان 585 بەتتىك قۇجاتتىڭ ءماتىنى پارلامەنتتە باياندالادى. بريۋسسەلدە دە ەۋرووداق قۇرامىندا قالعان 27 ەلدىڭ وكىلدەرى Brexit ماسەلەسىن كەڭىنەن تالقىلاعان بولاتىن. ەۋرووداق تاراپىنان كەلىسسوز جۇرگىزۋشى ميشەل بارنە مەن ەۋروپالىق كەڭەستىڭ پرەزيدەنتى دونالد تۋسك Brexit بويىنشا بارلىق جاعدايدى تەكسەرمەك.

ايتا كەتەيىك، ۇلىبريتانيا ەۋرووداق قۇرامىنان 2019 جىلدىڭ 29 ناۋرىزىندا شىعادى. ال 2020 جىلدىڭ سوڭىنا دەيىن ىشكى نارىقتاعى جاعداي، ديپلوماتيالىق بايلانىس پەن ەۋروپالىق ساياساتقا رەفورمالار ەنگىزىلمەيدى. ساراپشىلاردىڭ بولجامى بويىنشا، بريتانيا پارلامەنتىنىڭ تەرەزا مەيگە سەنىمسىزدىك ۆوتۋمىن جاريالاۋى دا عاجاپ ەمەس.

"The Qazaq Times"