اقش قورعانىس وكىلدەرى Google-ءدىڭ قىتايعا كورسەتكەن كومەگىنەن كۇدىكتەنەدى

بيىل جىل باسىندا Google كومپانياسى اقش قورعانىس مينيسترلىگىمەن ۇشاقتارعا جاساندى ينتەللەكت جوباسىن ازىرلەۋ تۋرالى كەلىسىمشارتتان باس تارتقانىن بىلدىرگەن ەدى. اتالعان كومپانيا ونىڭ سەبەبىن، سوعىسقا ارنالعان تەحنولوگيالاردى قۇراستىرۋعا قارسى ەكەندىگىمەن تۇسىندىرگەن. كەيىن، Google كومپانياسى قىتاي نارىعىنا قايتا كىرۋ ءۇشىن، ىزدەۋ جۇيەسىن قىتاي نارىعىنا بەيىمدەۋگە تىرىستى جانە بەيجىڭ بيلىگىنىڭ تالابىنا سايكەس، ىزدەستىرۋ قۇرىلعىسىنىڭ مازمۇنىنا باقىلاۋ، سالىستىرۋ، ىزگە ءتۇسۋ پروتسەستەرىن كىرىستىرۋگە ماقۇل بولدى.

ال، كەشە «ۋاشينگتون پوست» باسىلىمى ۇيىمداستىرعان سەميناردا، اقش قارۋلى كۇشتەرىنىڭ ەڭ جوعارى اسكەري كومانديرى Google كومپانياسىنا دەگەن كۇدىگىن جايىپ سالدى.

سەميناردىڭ مودەراتورى Google كومپانياسىنىڭ اقش اسكەري تەحنيكالارىن دامىتۋعا كومەكتەسۋىن توقتاتقانىمەن، كەرىسىنشە قىتاي ۇكىمەتىنىڭ ەركىندىكتى شەكتەۋ ارەكەتتەرىنە كومەكتەسكەنى تۋرالى سۇراق قويدى. اقش اسكەري شتاب كومانديرلەر كوميتەتىنىڭ توراعاسى، ادميرال جوزەف دانفورد بۇل تۋرالى: «ءبىز قىتايدىڭ ءوز ازاماتتارىنىڭ ەركىندىگىن شەكتەپ وتىرعانىن دا، زياتكەرلىك مەنشىك قۇقىعىن بۇزاتىنىن دا بىلەمىز. الايدا، مەنى تاڭقالدىراتىنى – ءبىزدىڭ كومپانيانىڭ قىتايدىڭ ىسكەرلىك مۇددەلەرىن دامىتۋعا كومەكتەسەتىنى»، – دەدى.

2014 جىلدان 2017 جىلى شىلدەگە دەيىن اقش قورعانىس ءمينيسترىنىڭ ورىنباسارى بولىپ كەلگەن ۋولكەر دە وسىعان بۇرىن Google كومپانياسىنىڭ «ەكىجۇزدىلىگىن» سىنعا العان ەدى. ول سوزىندە: «Google -دىڭ قىتايدا جاساندى ينتەللەكت ورتالىعى بار. قىتايدىڭ جاساندى ينتەللەكت ورتالىعىنداعى كەز-كەلگەن تەحنولوگيا قىتاي ۇكىمەتىنىڭ قولىندا، سوڭىندا ول قىتاي ارمياسىنىڭ پايدالانۋىنا بەرىلەدى»، – دەگەن بولاتىن.

كەشەگى سەمينار كەزىندە جوزەف دانفورد: «مەن Google كومپانياسىنىڭ رەسەي مەن قىتايدىڭ باسىمدىلىعىنداعى الەمدى كورگىسى كەلەتىنىنە سەنە المايمىن»، – دەدى. ول جانە اقش اسكەري جانە جەكە كاسىپورىندار اراسىنداعى تەحنولوگيالىق ىنتىماقتاستىق اقش قارۋلى كۇشتەرىنە سوڭعى 70 جىلدا اشىق ءارى ەركىن الەمدى ساقتاۋىنا مۇمكىندىك بەرگەنىن العا تارتتى.

ادميرال دانفوردتىڭ ايتۋىنشا بولاشاقتا ناعىز باسىمدىققا يە ارميانىڭ كىم ەكەنىن  جاساندى ينتەللەكت تەحنولوگياسى ايقىندايتىن بولادى. سوندىقتان ول،   Google سىندى ءىرى تەحنولوگيا كومپانيالارىنىڭ اقش قورعانىس سالاسىمەن ىنتىماقتاستىقتى جالعاستىرۋىن ءۇمىت ەتەدى.

Google كومپانياسى بۇل جوبادا ادامداردىڭ ەركىندىگىنە قول سۇعاتىن «قاتەلىكتىڭ» بار ەكەنىن مويىنداعان.  الايدا، جوبا ءالى دە زەرتتەۋ ساتىسىندا تۇرعانىن ايتادى.

“The Qazaq Times”