مەكسيكادا «ميگرانتتار كەرۋەنى» اشتىق جاريالادى

مەكسيكانىڭ تيحۋانا قالاسىنداعى «ميگرانتتار كەرۋەنى» اقش-تان ساياسي باسپانا الۋ ءۇشىن اشتىق جاريالادى.

وسىعان دەيىن اقش-تىڭ يمميگراتسيالىق جانە كەدەندىك باقىلاۋ قىزمەتىنىڭ باسشىسى كەۆين ماكەلينەن: «بوسقىنداردى ەلىنە قايتارامىز. امەريكا كوشباسشىسىنىڭ مالىمدەمەسىنە ساي، قۇقىق بۇزۋعا جانە زاڭسىز ارەكەتتەرگە جول بەرمەيمىز»، – دەگەن بولاتىن. زاڭسىز جولمەن شەكارا اسپاق بولعان بوسقىنداردى ەلىنە قايتارۋ ءۇشىن شەكاراعا قارۋلى اسكەريلەر ورنالاستىرىلعان. بىراق، بيلىكتەگى ادىلەتسىزدىك پەن قارجىلىق داعدارىستان قۇتىلماق بولىپ تۋعان جەرىنەن قاشقان ميگرانتتار سانى ازايعان جوق.

بۇل ماسەلەگە قاتىستى اقش پرەزيدەنتى دونالد ترامپ ءوزىنىڭ Twitter-دەگى جازباسىندا: «لاتىن امەريكاسى ەلدەرى ميگرانتتاردى بەرى جىبەرمەسە نەمەسە مەكسيكا تاراپى ولاردى ءبىزدىڭ وڭتۇستىك شەكارامىزعا جەتكىزبەي توقتاتسا دۇرىس بولار ەدى. بۇل ەلدەر ولاردى اقش-قا جىبەرىپ قۇتىلعىسى كەلەدى. بۇلاي ىستەۋگە بولمايدى. ەگەر سوت بويىنشا بوسقىنداردىڭ قۇجاتى تولىق، ءارى دۇرىس بولسا، شەكارانى اشامىز. ال سوت رۇقسات بەرمەگەن ميگرانتتاردىڭ ءبىر دە ءبىرىن اقش-قا كىرگىزبەيمىز»، – دەپ مالىمدەدى.

قازىرگى ۋاقىتتا ەكى ەل شەكاراسىندا 7 مىڭعا جۋىق بوسقىن بار. نارازىلىق شاراسىنىڭ قانشا ۋاقىتقا سوزىلاتىنى، ءارى وعان قانشا ادامنىڭ قاتىسقانى ازىرشە بەلگىسىز.

"The Qazaq Times"