اقش ۇكىمەتى قىتايلىق Huawi-ءدى تىڭشىلىق جاساۋشى دەپ ايىپتاۋدا. فوتو: VOA.

اقش ۇكىمەتى وداقتاس ەلدەرىنىڭ ينتەرنەت-وپەراتورلارىن قىتايلىق Huawei بايلانىس قۇرىلعىلارىن پايدالانباۋعا كوندىرۋدە. بۇل تۋرالى امەريكالىق تانىمال باسىلىم The Wall Street Journal ءبىر كۇن بۇرىن كولەمدى ماقالا جاريالادى.

قىتايلىق ءىرى تەحنولوگيا كومپانياسى سانالاتىن Huawei جاقىندا قۇراما شتاتتا قاتاڭ تەكسەرۋدەن ءوتتى. اقش بارلاۋ قىزمەتكەرلەرى مەن وزگەدە رەسمي تۇلعالاردىڭ ايتۋىنشا، Huawei قاتارلى تەحنولوگيا كومپانيالارى قىتاي ۇكىمەتىنىڭ شەتەلدەردەگى تىڭشىلىق مۇمكىندىكتەرىن جانە سوعان تاۋەكەل ەتۋ مۇمكىندىگىن ارتتىرادى.

اتالعان باسىلىمنىڭ قۇپيا دەرەككوزدەرگە سىلتەمە جاساعان حابارىندا، اقش ۇكىمەتى لاۋازىمدىلارىنىڭ Huawei جابدىقتارىن كەڭىنەن پايدالاناتىن وداقتاس ەلدەردەگى مەملەكەت قىزمەتكەرلەرى جانە تەلەكوممۋنيكاتسيا سالاسىنىڭ باسشىلارىمەن تىعىز بايلانىس ورناتىپ وتىرعانىن ايتادى.  ارى، ولارعا جەلى قاۋىپسىزدىگىنىڭ ماڭىزدىلىعى تۋرالى ەسكەرتەدى.

اقش ۇكىمەتى قازىرگى ۋاقىتتا قىتايلىق تەحنولوگيالارعا كوبىرەك سۇيەنەتىن مەملەكەتتەردىڭ اتالعان سالاداعى دامۋىن قولداۋ ءۇشىن قاراجات ءبولۋ ءىسىن قاراستىرۋدا. بىلايشا ايتقاندا، وزىنە وداقتاس ەلدەردى قىتاي تەحنولوگيالارىنا تاۋەلدىلىكتەن ارىلتۋ ءۇشىن، سول ەلدىڭ تەحنولوگيا سالاسىنىڭ دامۋىنا قولداۋ كورسەتەدى.

قۇراما شتات، اسىرەسە، گەرمانيا، يتاليا جانە جاپونيا سەكىلدى اقش-تىڭ ماڭىزدى اسكەري بازالارى بار ەلدەردە قىتايلىق تەلەكوممۋنيكاتسيالىق قۇرال-جابدىقتاردىڭ پايدالانىلۋىنان ەرەكشە الاڭدايدى.

“The Qazaq Times”