اقش پرەزيدەنتى دونالد ترامپ بەيسەنبى كۇىن جاساعان مالىمدەمەسىندە، ول باسقارعان ۇكىمەت اۋعانستاندا «سۇراپىل كەلىسسوزدەر» جۇرگىزىپ جاتقانىن، الايدا، ونىڭ تابىستى بولاتىنىنا كوز جەتكىزە المايتىنىن ايتتى. ترامپ بۇل مالىمدەمەسىن اۋعانستانداعى اقش قارۋلى كۇشتەرى ۇيىمداستىرعان تەلە-كونفەرەنتسيا كەزىندە ورتاعا سالدى.

مالىمدەمەدە ترامپ جۇرتتى جالت قاراتقان جاڭالىقتى دا ايىپ ءوتتى. ول اۋعانستانداعى قارۋلى كۇشتەرگە سول ەلگە ساپارلاي بارۋى مۇمكىن ەكەنىن ەسكەرتتى.

«كوپتەگەن ادام بىلە بەرمەسە كەرەك، ءبىز اۋعانستاندا وتە كۇشتى كەلىسسوزدەر جۇرگىزىپ جاتىرمىز. بۇل مۇمكىن تۇڭعىش رەت بولىپ وتىر، ءبىز اۋعان جەرىندە سۇراپىل كەلىسسوزدەردى جاسادىق. ءوز ۋاقىتىندا ءبىز نە بولاتىنىن كورەتىن بولامىز. ءبىز بەيبىتشىلىكتى تالقىعا سالۋدامىز، ۋاقىتى جەتكەندە بەيبىتشىلىكتىڭ بولاتىن-بولمايتىنىن دا كورەتىن بولامىز»، – دەدى ترامپ.

قازىر تاليبان كۇشتەرى ۋاشينگتون قولداۋىنداعى ۇكىمەت كۇشتەرىنە توقتاۋسىز شابۋىل جاساۋدا. سوعان قاراماستان، اقش-تىڭ رەسمي وكىلى حاليلزاد تاليبان تارابىمەن تىكەلەي كەزدەسىپ كەلىسسوز جۇرگىزگەن.

ەلدەگى ماسەلەنىڭ سالماقىتى ەكەنىن قاراماستان اقش پرەزيدەنتىنىڭ ءسوزى ەكىۇشتى بولدى. «ءبىز قازىر تالقىلاۋدامىز. ونىڭ تابىستى بولاتىن-بولمايتىنى بەلگىسىز. كىم بىلەدى – تابىستى بولۋى دا مۇمكىن، بولماۋى دا مۇمكىن. ءبىر انىعى ءبىز اۋعانستاندا كەلىسسوز جاساپ وتىرمىز»، – دەدى اقش پرەزيدەنتى.

“The Qazaq Times”