قىتاي اقش-پەن ساۋدا سوعىسىندا مۇددەسىن قورعاۋ ءۇشىن ەۋروپا ەلدەرىنە بەت بۇرۋدا

قىتايدىڭ ۆيتسە-پرەمەرى ليۋ حى كەلەسى اپتادا گەرمانياعا ساپارلاي بارىپ، 8-ءشى كەزەكتى قىتاي-ەۋروپا فورۋمىنىڭ گامبۋرگ سامميتىنە قاتىسادى. ساراپشىلار، بۇل قىتاي بيلىگىنىڭ قۇراما شتاتپەن ساۋدا سوعىسىندا ءوز مۇددەلەرىن قورعاۋ ماقساتىندا جاسالعان قادام دەپ قارايدى.

2004 جىلى باستالعان ەۋروپا-قىتاي فورۋمى گامبۋرگ ءسامميتى ەكى جىلدا ءبىر رەت ءوتىپ كەلەدى. سودان بەرى بۇل فورۋم قىتاي مەن ەۋروپا وداعى اراسىنداعى قارىم-قاتىناستى رەتتەۋ، تۇسىنىستىكتى تەرەڭدەتۋگە جاردەمدەسۋ، قىتاي مەن ەۋروپانىڭ ساياسي، ەكونوميكالىق جانە اكادەميالىق جەتەكشىلەر اراسىنداعى جانە تاراپتاردىڭ جوعارى دەڭگەيدەگى كەزدەسۋلەرى مەن الماسۋلارىنا جول اشىپ كەلەدى.

وسى ايدىڭ سوڭىندا، ارگەنتينادا وتەتىن G20 سامميتىندە اقش پرەزيدەنتى ترامپ پەن قىتاي باسشىسى شي جينپيڭ اراسىندا جوعارى دەڭگەيدەگى كەزدەسۋ جوسپارلانۋدا. ترامپ-شي ءسامميتى قارساڭىندا شي ءجينپيڭنىڭ ەكونوميكالىق كەڭەسشىسى ليۋ حىنىڭ گەرمانيا ساپارى الەم اقپارات قۇرالدارىنىڭ نازارىن وزىنە اۋداردى.

قازىر اقش-قىتاي اراسىنداعى ساۋدا قاقتىعىسى كۇشەيە تۇسۋدە. وعان قوسا، ترامپ-شي كەزدەسۋدە ەكى جاققا ورتاق ءتيىمدى كەلە الاتىنىنا ەشكىم كەپىلدىك بەرمەيدى. سوندىقتان دا، قىتاي ءبيلىنى ەۋروپا ەلدەرىمەن قارىم-قاتىناستى كۇشەيتۋ تىرىسۋدا. اسىرەسە، بيىل بۇل باعىتتا بەيجىڭ بيلىگى بارىن سالا تىرىسىپ باقتى.

قۇراما شتات پرەزيدەنتى ترامپ گەرمانيانى اقش-پەن ۇزاق مەرزىمدى ساۋدا كەلىسىمىن قامتاماسىز ەتپەدى دەپ سىنعا الدى. ەگەر ترامپ گەرمانيانىڭ اقش-قا باعىتتاعان ەكسپورتىنا تاريفتەر ەنگىزەتىن بولسا، وندا بۇل نەمىس ەكونوميكاسىنا ۇلكەن سوققى بولادى دەگەن بولجامدار بار.

الايدا، مىنا ءبىر ماسەلەنى ەسكەرۋگە تۋرا كەلەدى. گەرمانيا دا اقش-قا ۇقساس، قىتايدىڭ ادىلەتسىز ساۋدا ساياساتى مەن زياتكەرلىك مەنشىك قۇقىعىن ۇرلاۋ ارەكەتتەرىنە قاتتى نارازى. سوندىقتان دا، قىتاي ەكونوميكاسىن اشىق نارىقتىق ەكونوميكا رەتىندە مويىنداماعان ەلدەر قاتارىندا قالدى. سوندا دا، اقش-قىتاي اراسىندا ساۋدا سوعىسى باستالعاننان بەرى گەرمانيا تارابى تاڭداۋ جاساۋدان باس تارتىپ كەلدى.

قىتاي توراعاسىنىڭ ەكونوميكالىق كەڭەسشىسى، ۇكىمەت باسشىسىنىڭ ورىنباسارى ليۋ حىنىڭ گەرمانيا ساپارىندا بەرليندى قىتايمەن ساۋدا بايلانىسىن كەڭەيتۋگە كوندىرۋگە تىرىسارى حاق. بۇل قىتايدىڭ اقش-پەن ساۋدا سوعىسىنداعى تەڭسەلگەن ەكونوميكاسىن ساقتاپ قالۋ ءۇشىن ەۋروپاعا قاراي بارىنشا بەت بۇرىپ وتىرعانىن تۇسىندىرەدى.

“The Qazaq Times”