ەۋروپا ەلدەرى قىتاي مەن رەسەيدەن قورعانباق

ەۋروپالىق مەملەكەتتەر قىتاي مەن رەسەيدەن قورعانۋ ماقساتىندا ورتاق ارميا قۇرماق.

ستراسبۋرگتە وتكەن جيىندا گەرمانيا كانتسلەرى انگەلا مەركەل ەۋروپا كۇشتەرىن بىرىتكىرىپ، اسكەري بىرلەستىك قۇرۋعا شاقىردى. ءوز مالىمدەمەسىندە ول: «اسكەري باعىتتا ورتاقتاسۋىمىز قاجەت. ەۋروپا سوندا عانا مىقتى بولادى. ءوز تاعدىرىمىزدى ءوزىمىز قولىمىزعا الۋىمىز كەرەك»،– دەدى. ونىڭ ايتۋىنشا، ەۋروپا ەلدەرى ناتو-مەن كۇش بىرىكتىرۋ ارقىلى ۇلتتىق قاۋىپسىزدىكتى ساقتاي الادى.

وسىعان دەيىن فرانتسيا پرەزيدەنتى ەممانۋەل ماكرون Europe-1 راديوسىنا سۇحبات بەرىپ، «ءبىز ءوزىمىزدى قىتاي، رەسەي، تىپتەن اقش-تان دا قورعاۋىمىز قاجەت» – دەگەن بولاتىن. ماكروننىڭ بۇل ويىنا گەرمانيا قولداۋ ءبىلدىردى. Daily Telegraph باسىلىمىن پاريج بەن بەرليننىڭ ارميا بىرىكتىرۋگە تاس-ءتۇيىن دايىن ەكەندىگىن جازدى. ال قۇراما شتاتتارىنىڭ پرەزيدەنتى دونالد ترامپ: «ەۋروپا ءبىرىنشى كەزەكتە ناتو-نىڭ شىعىندارىن ازايتۋعا كومەكتەسسىن. شىعىننىڭ باسىم بولىگىن اقش كوتەرىپ وتىر»، – دەپ ماكروننىڭ بۇل ويىن سىنعا الدى. سونىمەن قاتار، ترامپ ءبىرىنشى جانە ەكىنشى دۇنيەجۇزىلىك سوعىس كەزىندە ەۋروپا مەملەكەتتەرىن قىتاي مەن رەسەيدەن قورعاپ قالعان نەگىزگى كۇش – گەرمانيا ارمياسى ەكەنىن ەسكە سالدى. ول Twitter پاراقشاسىندا «مۇنىڭ ارتى فرانتسيانى قانداي جاعدايعا اكەلدى؟» –  دەپ قىسقا قايىردى.

ەسكە سالا كەتەيىك، وتكەن اپتادا اۋستراليا ازيا-تىنىق مۇحيتى ەلدەرىن قىتايدان قورعاۋ ءۇشىن اتالعان ايماقتاردىڭ ينفراقۇرىلىمدىق جاعدايىن جوندەۋ ماقساتىندا ارنايى قور اشاتىنىن مالىمدەگەن بولاتىن. سەبەبى، 2010 جىلدان بەرى بەيجىڭ تاراپى وسى ايماقتاعى ەلدەردىڭ ەكونوميكاسى مەن تۋريزم سالاسىن دامىتۋ ءۇشىن 1,5 ميلليارد دوللار نەسيە بولگەن. قىتايدىڭ بۇل «قىزىعۋشىلىعى» ءوز كەزەگىندە باتىستىڭ الاڭداۋشىلىعىن تۋعىزدى. وسىعان قاتىستى اۋستراليا پرەمەر-ءمينيسترى سكوتت مورريسون: «قوردىڭ باستى ماقساتى – قىتايدىڭ ىقپالىن تەجەۋ» ەكەندىگىن ايتقان.

"The Qazaq Times"