ۇلىبريتانيا ورتا-شىعىستا بەلسەندى اسكەري قادامدار جاساي باستادى. وسىدان بىرنەشە كۇن بۇرىن اۋە كۇشتەرىنىڭ باس قولباسشىسى كاتارعا رەسمي ساپارمەن بارىپ، بريتان-كاتار اراسىنداعى قورعانىس ىنتىماقتاستىعىن جانداندىرعان ەدى. ال، ءبىر كۇن بۇرىن قورعانىس ءمينيسترى گاۆين ۆيليامسون مالىمدەمە جاساپ، وماندا ەكى ەل بىرلەسكەن اسكەري بازا قۇراتىنىن جەتكىزدى.

ۇلىبريتانيا قورعانىس ءمينيسترى گاۆين ۆيليامسون. فوتو: NBC.

ۇلىبريتانيا مەن ومان اراسىنداعى اسكەري ىنتىماقتاستىقتىڭ ءجۇز جىلدان استام تاريحىنىڭ بار ەكەنىن ايتا كەلىپ، ۆيليامسون كەزەكتى جاڭا اسكەري بازا 2019 جىلى ناۋرىز ايىندا اشىلاتىنىن حابارلادى. ول بۇل اسكەري بازا ەكى ەلدىڭ قورعانىس ىنتىماقتاستىعىن بەكەمدەيدى دەپ قارايدى.

مالىمدەمەدە، الداعى جىلى بريتانيا-ومان جوعارى لاۋازىمدىلارى جاڭا ءارى اۋقىمدى قورعانىس ىنتىماقتاستىعىنىڭ كەلىسىمىنە قول قوياتىنى ايتىلعان.

مۇنايلى الاپتاعى اقش پەن ۇلىبريتانيانىڭ اسكەري بازالارى. فوتو: alaraby.co.uk.

سوڭعى جىلدارى اعىلشىن كورولدىگى اراب تۇبەگى، پارسى شىعاناعىنداعى جانە قىزىل تەڭىزدەگى باسەڭدەپ قالعان بەلسەندىلىگىن قايتا جانداندىرا ءتۇستى. بيىل جىل باسىندا باحرەيندە تۇراقتى اسكەري بازاسىن اشتى. جاقىندا عانا كاتارمەن قورعانىس ىنتىماقتاستىعىن جاڭا بەلەسكە كوتەردى. بۇدان تىس ۇلىبريتانيانىڭ يراكتا، كۋۆەيتتە، كاتاردا، اۋعانستاندا جانە بىرىككەن اراب امىرلىگىندە اسكەري بازالارى بار. ەندى وماندا قورعانىس ىنتىماقتاستىعىن كۇشەيتۋدە.

بۇل اعىلشىن بيلىگىنىڭ وسى اتالعان مۇنايلى الاپقا جاڭا ستراتەگيامەن بەت العانىن انىق اڭعارتادى.

“The Qazaq Times”