ورتا-شىعىستىڭ كومەسكىدەگى ويىنشىسى: ۇلىبريتانيا كاتارعا اسكەري قولداۋدى كۇشەيتپەك

ۇلىبريتانيا كاتارمەن اسكەري ىنتىماقتاستىقتى كۇشەيتپەك. بۇل تۋرالى ۇلىبريتانيانىڭ اۋە كۇشتەرى قولباسشىسى ستەفان حيلليەردىڭ كاتار ساپارى كەزىندە بەلگىلى بولدى. ول كاتار ورتالىعى دوحا قالاسىندا سول ەلدىڭ قورعانىس ءمينيسترى حاليد يبن-مۇحاممەد ءال-اتيەمەن كەزدەستى.

كەزدەسۋ جابىق كۇيدە وتكەنىمەن ەكى ەلدىڭ اقپارات قۇرالدارى كاتار-ۇلىبريتانيا اراسىندا قورعانىس ىنتىماقتاستىعىنىڭ كۇشەيتىلەتىنىن حابارلاۋدا.

حيلليەر وسىدان بۇرىن كاتاردىڭ باس شتاب باسقارماسىنىڭ توراعاسى گانيم يبن شاحيم ءال-گانيممەن دە كەزدەسۋ وتكىزگەن.

ەكى ەلدىڭ قورعانىس وكىلدەرى كەزدەستى. فوتو: Doha News.

كاتار شاعىن ەل بولعانىمەن، ورتا شىعىستاعى ساياسي ويىنىندا ءوزىنىڭ ساياسي، اسكەري جانە ستراتەگيالىق سالماعىن تانىتىپ كەلە جاتىر. 2017 جىلى كاتار داعدارىسى كەزىندە ساۋد ارابياسى باستاعان وزگە اراب ەلدەرىمەن قارىم-قاتىناسى ناشارلاي ءتۇستى. الايدا، بىرقاتار باتىس ەلدەرى، تۇركيا جانە يران سىندى ءوڭىردىڭ ماڭىزدى ويىنشىلارى كاتار جاعىنا بولىسقان بولاتىن.

كاتار مەن ۇلىبريتانيا اراسىنداعى اسكەري ىنتىماقتاستىقتىڭ باسى بۇنىمەن باستالمايدى. 2017 جىلدىڭ سوڭىندا «Typhoon» جويعىش ۇشاقتارىن ساتىپ بەرۋ جانە ساتىپ الۋ كەلىسىمىنە قول قويىلعان. سونداي-اق، ەكى ەل اراسىندا بىرلەسكەن اسكەري وقۋ-جاتتىعۋلاردا وتكىزۋ جوسپارلارى دا بار.

“The Qazaq Times”