بولتون: قىتاي زىمىراندارى رەسەي ءۇشىن اسا قاۋىپتى

 اقش پرەزيدەنتىنىڭ ۇلتتىق قاۋىپسىزدىك جونىندەگى كەڭەسشىسى جون روبەرت بولتون (John Robert Bolton) 26 قازان كۇنگى اقپارات قۇرالدارىنا بەرگەن مالىمەتىندە، قىتايدىڭ باسقارىلمالى زىمىراندارىنىڭ رەسەي ءۇشىن اسا قاۋىپتى ەكەنىن، «كەرەك بولسا «رەسەيدىڭ قولقا-جۇرەگىن دە» سۋىرىپ الاتىنىن» ايتقان.

ترامپتىڭ ۇلتتىق قاۋىپسىزدىك جونىندەگى كەڭەسشىسى روبەرت بولتون. فوتو: VOA News.

بولتون ماسكەۋ ساپارىنان كەيىن گرۋزياعا دا ساپارلاي باردى. ول تبيليسيدە REUTERS اقپارات اگەنتتىگىنىڭ سۇحباتىن قابىلداپ،  قىتايدىڭ رەسەيگە توندىرەتىن قاۋىپتەرى تۋرالى ءوز ويلارىمەن بولىسكەن. سونداي-اق، ۋاشينگتوننىڭ ماسكەۋمەن اسكەري ستراتەگيالىق ديالوگتار ورناتقىسى كەلەتىنىن ايتقان.

ترامپ ۇكىمەتى «قىرعي قاباق سوعىسى» كەزىندە اقش-كەڭەس وداعى اراسىندا قول قويعان كەلىسىمدەردەن باس تارتاتىنىن مالىمدەگەننەن كەيىن، بولتون ماسكەۋگە ارنايى ساپارمەن بارعان بولاتىن.

قىتايدىڭ بالليستيكالىق زىمىراندارىنىڭ قامتۋ ارالىعى. فوتو: gifex.com.

اقش ۇكىمەتى ءوز كەزەگىندە رەسەيدى اتالعان كەلىسىمدى ۇزاق ۋاقىتتان بەرى بۇزىپ كەلەدى دەپ ايىپتادى. ال، قىسقا جانە ورتا قاشىقتىقتاعى زىمىراندارعا باي قىتاي اتالعان كەلىسىمدە جوق ەكەنىن ايتقان بولاتىن.

قۇراما شتات قازىر تىنىق مۇحيتتاعى باستى قارسىلاسى قىتايعا قارسى ستراتەگيالىق جوسپارلار ازىرلەۋدە. ونىڭ العاشقىلارى قازىردەن باستاپ اتقارىلۋدا. قىتاي زىمىراندارىنا قارسى رەسەيدىڭ زىمىرانعا قارسى سۋپەر قورعانىس جۇيەسىنىڭ بار ەكەنى دە انىق. الايدا، ترامپ ۇكىمەتى قىتاي زىمىراندارىنىڭ رەسەيگە توندىرەتىن قاۋپىن ەسكەرتۋ ارقىلى، رەسەي مەن قىتايدى بىردەي قامتيتىن كەلىسىمگە قول جەتكىزۋگە تىرىسۋى مۇمكىن.

“The Qazaq Times”