گرۋزيادا پرەزيدەنت سايلاۋى. فوتو: GETTY IMAGES/BBC.

گرۋزيادا جەكسەنبى كۇنى وتكەن پرەزيدەنت سايلاۋدىڭ بيۋللەتەندەرى سانالىپ بولدى. بىراق، العاشقى اينالىمدا كانديداتتاردىڭ ەشبىرى دە باسىم داۋىس جيناپ كەتە المادى. بۇل تۋرالى BBC حابارلادى.

وسىدان بۇرىن «گرۋزين ارمانى» پارتياسى سايلاۋ تۋرالى الدىن-الا حالىقتىق ساۋالناما جۇرگىزگەن ەدى. سوعان نەگىزدەلە وتىرىپ، اتالعان پارتيا ءوز ۇمىتكەرى ءبىرىنشى اينالىمدا-اق 52 پايىزبەن باسىم تۇسەدى دەپ بولجاعان. الايدا، جەكسەنبىدەگى سايلاۋ ناتيجەسى ولاي بولماي شىقتى.

بەرىلگەن داۋىستىڭ 98,5 پايىزى سانالىپ بولعاننان كەيىنگى قورىتىندى بويىنشا، «گرۋزين ارمانى – دەموكراتيالىق گرۋزيا» پارتياسىنىڭ ۇمىتكەرى سالومە زۋرابيشۆيلي العا شىقتى. سايلاۋشىلاردىڭ 38,6 پايىزى قولداۋ كورسەتكەن. الايدا، ءبىرىنشى اينالىمدا ۇتىپ شىعۋ ءۇشىن وعان 50 پايىزدان جوعارى بولعان داۋىس سانى كەرەك ەدى.

ەكىنشى ورىندا 37,75 پايىز داۋىسپەن وپپوزيتسيانىڭ ۇمىتكەرى گريگول ۆاشادزە تۇردى. ول دا الداعى سايلاۋعا قاتىسا الادى. گرۋزياداعى كەزەكتى پرەزيدەنت سايلاۋدا 25 كانديداتتىڭ ەسىمى بار.

«ەۋروپالىق گرۋزيا» پارتياسىنىڭ اتىنان قاتىسۋشى ۇمىتكەر داۆيد باكرادزە العاشقى اينالىمدا ءوزىنىڭ ۇتىلعانىن مويىندادى. ال، سايلاۋدىڭ تولىق ناتيجەسى بۇگىن تۇندە جاريا بولماق.

جەكسەنبى كۇنى سايلاۋعا گرۋزيالىق داۋىس بەرۋ قۇقىعى بار ادامداردىڭ 46,74 پايىزى قاتىسقان. كونستيتۋتسياسى بويىنشا پرەزيدەنت التى جىلعا سايلانادى. سونداي-اق، جاڭا كونستيتۋتسيا نەگىزىندە بۇل جولى سايلانعان پرەزيدەنتتىڭ قۇقىقتارى بەلگىلى شەكتەۋلەرگە ۇشىرايتىن بولادى.

سايلاۋدىڭ ناتيجەسىنە نەگىزدەلگەندە گرۋزيانىڭ جاڭا پرەزيدەنتى ەكىنشى رەتكى سايلاۋدا انىقتالاتىن بولماق.

“The Qazaq Times”